Li navçeya Gimgim a Mûşê starta “Festîvala Jin û Xweza, Çandê” hate dayîn ku wê bi şîara “Bi jina azad, xweza û çandê re ber bi civaka demokratîk” du rojan dewam bike. Festîvala ku bi pêşengiya Şaredariya Gimgimê hatî lidarxistin, bi meşeke ku diyarî kesên 10’ê Tebaxa 2015’an di şerê li navçeyê de jiyana xwe ji dest dan û Kader Kevser Elturk (Ekîn Wan) a ku bedena wê hatî teşhîrkirin û jinên hatin qetilkirin hate kirin, destpê kir. Bi hezaran jinên ku bi dirûşmeya “Jin Jiyan Azadî” li navenda navçeyê meşiyan, piştre çûn qada festîvalê ya li gundê Alagoz. Ji bo festîvala ku wê du rojan dewam bike, jinan gelek merasîm lidar xistin; aştî, ekoloji û jineolojî nîqaş kirin.
Di festîvala ku li qadeke kesk hatî lidarxistin de, gelek saziyan stand danîn û li qada festîvalê pankarteke mezin a li ser “Jin Jiyan Azadî” hatî nivîsandin û pankartên “şer hilweşîna ekolojik a herî mezin e” hatin daliqandin. Li ber pankartên hatine daliqandin, atolye hatin lidarxistin, jin bi xwarinên ku li konên xwe û malên xwe çêkirine ketin hundirê qada festîvalê. Bi rengê komun nan hate xwarin û jinan bi hev re sohbet kirin û govend gerandin. Li qada ku konê çandê, konê ekolojiye û konên jineolojiyê lê hatîn danîn, roja ewilî ya festîvalê bi atolye û govendê derbas bû. Jin bi coş û samimiyet têkildarî festîvalê diaxivin. Hate ragihandin ku ev demek dirêje pêdivî bi merasîmeke wiha hebû û wiha hate gotin: “Em ê rêxistinbûna xwe xurt bikin û bi vî rengî ji festîvalê derbikevin.”
FESTÎVALEKE PIR BI WATE Û NIRX
Kevser Akçelîk a ji Amedê tevlî festîvalê bû, ev tişt bilêv kir: “Piştî demek dirêj, ev cara ewilî ye li Gimgimê xebateke wiha tê meşandin. Ev bi tena serê xwe nirxeke û girîng e. Di van du rojan de em ê bi jinan re nîqaşên kûr bikin. Em ê hem têkildarî siyasî hem jî avakirina civaka demokratîk axaftinan bikin. Bi atolyeyan em ê destpêkê vê nîqaşê û jinûve avakirinê, baxivin. Dîsa jî li ser xwezayê êrîşeke cidî heye. Dixwazin van xakan bêmirov bihêlin û ji sermayedaran re bihêlin. Îro vekirina festîvalê bi meşe çêbû. Em ji bo bîranîna Ekîn Wan meşiyan. Me li dijî teşhîrkirina bedena jinê, serî hilda. Bi vê meşê me nîşan da ku em polîtîkayên li hemberî jinê qebûl nakin. Her wiha me nerazîbûn nîşanî kuştin û tundiya li dijî jinan a li Mûşê zêde bûye, da.”
ME QADEK KOLEKTÎF AFIRAND
Kevser Akçelîk piştre ev tişt jî got: “Bi temamî bi rengekî kolektif li vir em hatin ba hev. Qasî du rojan em ê li vir bi sernavên sereke pirsgirêkên qewimîne û çareseriyê biaxivin. Em ê têkildarî pêvajoya siyasî û rojevên sereke yên têkildarî jinê, binirxînin. Ez bawerim ku em ê bi rengekî hîn xurttir û hîn zêdetir hakimê pêvajoyê, ji vê festîvalê derbikevin.”
EM EKOLOJÎ, AŞTÎ Û JINEOLOJIYÊ NÎQAŞ DIKIN
Evîn Taşdemîr a ji Igdirê ji bo tevlî festîvalê bibe hate Gimgimê, nêrînên xwe yên li ser festîvalê bi van gotinan anî ziman: “Li herêma Serhedê îro em jin festîvalekê lidar dixin. Ev festîval ji bo me pir bi qîmet e. Em ê ekolojî û aştiyê nîqaş bikin. Jinan di vê festîvalê de pirsgirêkên xwe û pirsên têkildarî pêvajoyê, nîşan dan. Axaftin û nîqaşkirin, ji bo me hemûyan baş hat. Di vê nuqteyê de divê çalakiyên wiha, hîn zêdetir bên kirin.”
