Hêzên Asayîşa Êzidxanê ku 14’ê Tîrmeha 2016’an bi armanca misogerkirina aramî û asayîşa li navenda Şengalê ava bû, salvegera xwe ya 9’emîn a damezrandinê pîroz kir.
Bi vê wesîleyê Fermandariya Giştî ya Hêzên Asayîşa Êzidxanê daxuyaniyek weşand û diyar kir ku Asayîşa Êzidxanê ji nava kavilên bi êş û azarên gel ava bûye.
Fermandariyê diyar kir ku armanca bingehîn a damezrandina vê hêzê ew e ku bibe mertalek parastinê û dîwarek bihêz ji bo parastina ax, şeref û rûmeta civaka Êzidî. Di daxuyaniyê de hat destnîşan kirin ku ev hêz ne di kêliyekê de çêbûye, lê encama rêwîtiyeke dirêj a sebir, têkoşîn û fedakariyê ye.
Di vê salvegerê de, Fermandariya Giştî bejna xwe li ber şehîdên xwe tewand, yên ku jiyana xwe ji bo azadî û ewlehiya gelê Êzîdxanê feda kirin. Daxuyaniyê anî ziman ku şehîdan wateya fedakarî û dilsoziyê fêrî hêzan kirine û rê li ber wan vekiriye ku di dewama erka xwe de sebir û tehemûl bikin, her çi qas dijwarî mezin bin jî.
Fermandariyê ragihand ku îro, neh sal piştî damezrandina Asayîşa Êzîdxanê, ew bi biryardarî û îradeyeke herî xurt li ser erka xwe ne. Wan ji tevahiya cîhanê re piştrast kir ku Asayîşa Êzîdxanê wê bê westan û bê paşvekişandin xizmeta gelê xwe bike, ewlehî û rûmeta wan biparêze. Her wiha hat gotin ku ew ê ji fedakariyê dudilî nebin û çi dibe bila bibe wê ji pêkanîna erka xwe ya pîroz paşve gav neavêjin.
Di dawiya daxuyaniyê de, Fermandariya Giştî ya Asayîşa Êzîdxanê anî ziman ku wan ev rê bi îradeya xwe ya azad hilbijartiye û ew ê heta dilopa dawî ya xwîna xwe dilsozê erka xwe bin.
Daxuyanî bi peyamên “Rûmet û nemirî ji bo şehîdên me” û “Azadî û ewlehî ji bo gelê mezin ê Êzîdxanê” bi dawî bû.
