Bi nêzhatina 11. Salvegera fermana 3.8.2014’an, mizginiyekê gihÎşt Şengalê û civaka Êzidî. Keça Êzidî Riham Hecî piştî 11 salan vegeriya axa pîroz a Şengalê. Rîham Hecî ku li Bakur-Rojhilatê Sûriyeyê ji aliyê hêzên YPJ’ê ve hatibû rizgarkirin, îro li navenda YBŞ’ê ya li Xanesorê radestî malbata xwe hate kirin.
Rîham Hecî, xelkê Xanesorê ye, di dema êrîşa çeteyên DAÎŞ’ê de dîl hatibû girtin. Piştî nêzîkî 11 salan, ji aliyê Hêzên Sûriya Demokratîk (QSD) ve hate rizgarkirin.
Piştî ku malbata Rîham hate naskirin, ew radestî Mala Êzidiyan li Rojava hate kirin û bi rêya lijneya têkiliyan a YBŞ û YJŞ’ê îro gihişt Şengalê. Malbata wê û nas û dostên wan bi tilîliyan li navenda YBŞ a Xanesorê ew pêşwazî kirin.
‘MIN DI JIYANA XWE DE KÊFXWEŞIYEK WIHA JIYAN NEKIR’
Rîham, ku di sala 2003’an de ji dayîk bûye, di temenê xwe yê 10 salî de ketibû destê DAê. Ji ber ku 11 salan di nava DAÎŞ’ê de mabû, zimanê dayikê ji bîr kiribû. Lê belê, ji ber ku rizgar bûye û vegeriyaye mala xwe, kêfxweşiya xwe anî ziman. Rîham got: “Di temenê xwe de min tu carî kêfxweşiyeke wisa nedîtiye, ez nizanim çawa vê kêfxweşiyê bînim ziman. YPJ’ê li Sûriyeyê ez rizgar kirim û bi riya hevalan îro ez gihiştim malbata xwe, ev ji bo min ji nû ve dayîkbûn e. Ez pir kêfxweş im ku wisa bi coş ji aliyê gelê xwe ve hatime pêşwazîkirin.”
‘HEYA EZ SAX BIM VÊ QENCIYA HEVALAN JI BÎR NAKIM’
Dayika Rîham jî li ser rizgarkirina keça xwe, di serî de spasiya YBŞ-YJŞ’ê û her kesê ku di rizgarkirina keça wê de alîkar bûye kir û got: “Heya ez sax bim, ez qenciya hevalan ji bîr nakim. Hevalan ji bo me gelek kir, ew hemû keç û kurên me ne. Ji malbata min hîna gelek kes mane, ez bi hêvî me ku heval rojekê wan jî rizgar bikin û li me vegerînin.”
Li ser navê YJŞ’ê, Sozdar Şengalî jî wiha got: “Me di ber rizgarkirina Rîham de zehmetî dît, lê em pê serbilind in. Ji ber ku her keçek me ku ji tarîtiya DAÎŞ’ê rizgar bibe, ji me re dibe hêz û moral. Em wek YJŞ’ê û YBŞ’ê em ê berdewam bikin heya yek keç û zarokên me di destê wan hovan de hebin. Rizgarkirin û parastina jinên Êzidî erka me ye. Em pir kêfxweş in ku îro Rîham gihîşt malbata xwe û em jî niha Rîham radestî malbata wê dikin û dibêjin ser xêrê be.”
