Cenazeyê Dayika Şemiyê Emîne Ocak li Qada Galatasarayê bi merasîmekê hate oxirkirin. Hevseroka Komeleya Mafên Mirovan (ÎHD) Eren Keskîn, endama Heyeta Îmraliyê Pervîn Bûldan, Berdevka Partiya Demokrasî û Wekheviyê ya Gelan (DEM Partî) Ayşegul Dogan, parlamenterên Stenbolê yên DEM Partiyê, rêveberên bajar û navçeyan, parlamenterê Amedê yê Partiya Gel a Komarê (CHP) Sezgîn Tanrikûlû, mirovên Şemiyê, rêxistinên civakî yên sivîl, parêzvanên mafên mirovan, Dayikên Aştiyê, partiyên siyasî û bi sedan kes tevlî merasîmê bûn.
Darbesta Emîne Ocak a bi paçê reş pêçandî anîn Qada Galatasarayê, li maseya ku darbest lê hate danîn wêneyê Emîne Ocak û pankarta bi nivîsa “Min dest jê berneda, ez dest jê bernadin” hate daliqandin. Qurnefîl danîn ser darbestê. Di merasîmê de qala çîroka jiyanê ya Emîne Ocak hate kirin.
Keça Emîne Ocak Masîre Ocak axivî û got, “Dayika min a ku ji êşê sebir, ji sebirê jî hêvî afirand. Dayika min tu bû hêvî di dilê bi milyonan mirovî de. Tu her tim bi serbilindî sekinî. Ne tenê êşa te, êşa her kesî di dilê te de bû. Me di çavên te de êşa yên windakirî hîs kir. Em ê wan ji bîr nekin. Em niha te ber bi Hasan bi rê dikin. Hişê gelekî bi dilê dayikekê lê dide. Em ê ji bo hemû dayik, bav û xizmên xwe yên windakirî li ber xwe bidin.”
Hevjîna Fehmî Tosûn ê bi kiryar nediyar hate windakirin Hanim Tosûn got, “Em sozê didin te Dayika Emîne, em ê têkoşîna te li erdê nehêlin. Oxir be ji te re. Li wê derê dayik hene ku li benda te ne. Dayika Elmas, Dayike Berfo, Hasan li wir e. Dema ku te Hasan hembêz kir, em ê jî kêfxweş bibin.”
Endama Heyeta Îmraliyê Pervîn Bûldan jî got, “Ev qad qada dayika Emîne ye. Ev qad qada berxwedanê ye ku beriya 30 salan destpê kir. Te li pişt xwe bi milyonan mirov hişt. Silavan li Hasan, Savaş, Abdullah bike. Kujer wê bêne darizandin, hesab bidin. Oxir be ji te re Dayika Emîne.”
Hevseroka ÎHD’ê Eren Keskîn jî got, “Dayika Emîne yek ji wan kesan bû ku çalakiya bê îteatiya sivîl dan destpêkirin. Têkoşîna dayikên Şemiyê ewqasî xurt bû ku îro neçar man vê qadê vekin. Te em hînî gelek tiştan kir, xweş razê.”
Merasîm bi dirûşma ‘Dayê em li vê derê ne’ bi dawî bû. Cenazeyê Emîne Ocak wê saet di 16:00 de bibin Cemxaneya Gazî. Piştre jî li Goristana Gazî li kêleka gora kurê wê Hasan Ocak bê veşartin.
