Dayika Şemiyê Emîne Ocak ya di 20’ê Hezîranê de ji ber krîza dil a ji ber têkçûna nefesê li beşa lênêrîna giran dihat dermankirin, di 23’ê Tîrmehê de jiyana xwe ji dest da. Merasîma cenazeyê Emîne Ocak li Qada Galatasarayê, cihê berxwedana mirovên Şemiyê, hate lidarxistin. Pişt re cenazeyê Ocak li Goristana Gazî li kêleka gora kurê xwe Hasan Ocak hat veşartin.
Tabûta Emîne Ocak bi qumaşê reş ê bi wateya “Her dem şîn” hate nixumandin û bi kulîlkan hate xemilandin. Bi sedan kesên ku beşdarî merasîmê bûn, dirûşmên “Emîne Ocak nemirî ye”, “Winda dikin, wê winda bibin”, “Kujer wê hesab bidin gel” û “Hêrsa dayikan wê kujeran bifetisîne” hatin berzkirin.
Li ser navê malbata Ocak Dursun Guzel axivî û ji bo xwişka xwe Emîn got, “Laş dimire, lê can namir e. Xwişka min wê her tim di dilê me de bijî. Hemû canên ku li Qada Galatasarayê têdikoşin wê bi wê re têbikoşin.”
‘ÇINARA GALATASARAYÊ’
Xizmê windayan Îrfan Bilgî diyar kir ku Emîne Ocak “çinara Galatasarayê” bû û got: “Em ê wê oxir bikin, lê tiştên ku wê nîşanî me daye wê bidomin. Laşê wê ji nav me diçe, lê bawerî, berxwedan û hewldana wê ya domdar wê bi me re be. Em soz didin. Tu namirî, oxir be dayê.”
‘SEMBOLA TÊKOŞÎNÊ’
Parêzera malbata Ocak û parêzvana mafên mirovan Gulseren Yolerî jî anî ziman ku wê di 21’ê Adara 1995’an de piştî windakirina Hasan Ocak, Emîne Ocak nas kiriye û wiha got: “Eger dayika Emîne îro li virbûya me yê hemûyan bi evînî hev hembêz kiriba. Dayika Emîne sembola têkoşîna li dijî windakirinan bû. Hîn jî kujer tên parastin, çarenûsa windayan di tariyê de ye.”
‘EM LI KOLANÊN HASAN OCAK IN’
Serokê Giştî yê ESP’ê Mûrat Çepnî got ku axaftina li ser navê Emîne Ocak zehmet e û wiha domand: “Ew berî her tiştî mamosteyek bû. Mamosteya têkoşînê bû, çalakvanek yekgirtî bû. Ew xaka têkoşîna azadî û edaletê ye. Lê Dayikên Şemiyê û malbatên windayan li vê xakê têkoşînek meşandin ku polîtîkaya windakirinê ya faşîzmê rawestand. Ev têkoşîn ji me re dibêje: Gava em bi hev re bin, armancê bigrin û li rex hev bin, em dikarin bi ser bikevin. Çawa ku me polîtîkaya windakirinê rawestand, em dikarin hesabê windayan jî bipirsin, hêza me ji bo vê heye. Dayê Emîne heta kêliya dawî qet dev ji têkoşînê berneda. Em li kolanên serhildana Gaziyê ne. Em li kolanên Hasan Ocak in. Wekî hevalên Hasan Ocak, ji bo têkoşîna Emîne, heval û hemû malbatên windayan bi serkeftin bi dawî bikin, ji bo hesabê windayan bipirsin, em li vir in.”
‘DEYNÊ ME YÊ EDALETÊ HEYE’
Sezgîn Tanrîkulu jî axivî û got: “Ji Dayê Emîne û yên çûyî re deynê me yê edalet û aştiyê heye. Sembola windakirinên bi zorê, torosên spî dîsa di nav me de ne. Mesele têkoşîna li dijî vê zîhniyetê ye.”
‘RÊYEK NÛ VEKIRIN’
Berdevka DEM Partiyê Ayşegul Dogan jî axivî û wiha got: “Li ber Dayika Emîne em tenê dikarin soz bidin ku em ê têkoşînê bidomînin, bi ser bixin, dev jê bernedin û bi ser bikevin. Wan rêyeke nû ji me re vekir. Em îro li vir ji bo Dayika Berfo, Dayika Elmas, ji bo dayikên ku li qadê dilê wan diçirîne û ji bo zarokên wan soz didin.”
Ji Înîsiyatîfa Malbatên Pirsûsê Dîlek Şeker jî wiha got: “Dema min bavê xwe veşart, Dayika Emîne ji min re got, ‘Netirse keça min, tu bûyî ez, tu bûyî çalakvanek edaletê, tu bûyî Dayika Şemiyê, di baxçeya me ya kulîlkan de tu jî heyî.”
Gulsum Elvan jî ev tişt got: “Dayika Emîne ji roja destpêkê hat ba me û me hembêz kir” û diyar kir ku wê têkoşînê bidomîne.
Piştî axaftinan cenazeyê Emîne Ocak bi dirûşmeyan li Goristana Gazî li kêleka gora kurê xwe Hasan Ocak hat veşartin.
