Fermandarê Giştî yê Hêzên Sûriyeya Demokratîk (QSD) Mazlûm Ebdî qala fermandarê mezin ê Şoreşa Rojava Nûreddîn Sofî kir ku 6’ê Nîsana 2021’ê di êrîşa hewayî ya dewleta Tirk de şehîd bû.
Ebdî anî ziman ku şehîd Nûreddîn Sofî di serî de berxwedanên Efrîn, Serêkaniyê û Girê Spî li Rojava beşdarî gelek berxwedanan bû û got, Nûreddîn Sofî yek ji mîmarên operasyona kuştina şefê DAÎŞ’ê Ebûbekir El Bagdadî bû.
Fermandar Mazlûm Ebdî wiha qala welatparêziya malbatê û Fermandar Nûreddîn dike: “Heval Nûreddîn ji malbateke welatparêz, bi nirxê exlaq û olî ve girêdayî bû. Di gundekî de bû ku derdorê wan tevayî gelê Ereb bûn. Hem nirxên xwe yên netewî parastin, hem jî têkiliyên bi pêkhateya Ereb re di asta herî baş de bûn. Heval Nûreddîn jî li ser vî bingehî mezin bû. Vê yekê bandorek mezin li meşa wî ya di nava şoreşê de kir û bandorek gelek erênî bû.”
‘DI ZANÎNGEHÊ DE PÊŞENG BÛ’
Mazlûm Ebdî anî ziman ku wî û fermandar Nûreddîn Sofî bi hev re li Zanîngeha Helebê dixwend û ew roj bi van gotinan bi bîr anî: “Wê demê tevgera me ya şoreşgerî gihaştibû astekî. Xebatên me di zanîngehê de jî gihaştibûn astekî. Gelek alîgirên me çêbibûn. Heval Nûreddîn di demeke kurt de di nava xwendekarên Kurd de hat nasîn. Demeke dirêj di nava xwendekaran de xebat da meşandin û pêşengî kir. Di nava çalakiyên civakî de cih digirt, weke birêxistinkirina Newrozan, meşan, xebatên din ên civakî di hemûyan da hertim rolekî pêşeng dilîst. Ez dikarim bêjim hinek taybetendiyên xwe yên di nava şoreşê de jî ji wê demê girtin.”
Fermandar Nûreddîn ne tenê di nava zanîngehê de, di nava civakê de jî xebatên şoreşgerî dane meşandin. Mazlûm Ebdî dibêje, “Heval Nûreddîn li Helebê diçû nava gelê Kurd ê taxên Şêx Meqsûd, Eşrefiyê, Heyderiyê û xebat dida meşandin. Demekî çû Efrînê û xebat da meşandin.”
‘DIXWEST ROMANA ŞOREŞA ROJAVA BINIVÎSE’
Mazlûm Ebdî taybetmendiyeka din a fermandar Nûreddîn Sofî vegot û diyar kir ku ew kesekî rewşenbîr bû, ji nivîsandinê pir hez dikir. Di sala 1991’an de bi hev re ji salekê zêdetir di kovara Dengê Welat de kar kirine, fermandar Nûreddîn di hinek pirtûkên li ser şoreşê yên wê de dinivîsî. Mazlûm Ebdî got: “Bandora vê xebatê li tevayî jiyana wî ya di nava şoreşê de kir. Heval hemû dizanin tim meyla wî ji bo mijarên rewşenbîrî, xwendin, wêjeyî û zanistî hebû. Di nava tevgera me de wek şoreşgerekî rewşenbîr dihat naskirin. Her tim mereqa wî ya ji bo nivîsê hebû. Dema di nava Şoreşa Rojava de bû jî hewldanên wî yên nivîsîna romana şoreşa Rojava hebûn. Xebatên wî hebûn. Ez bawer dikim niha nivîsandinên wî yên hatine amedekirin jî hebin.”
‘CIHÊ BAWERIYÊ BÛ’
Mazlûm Ebdî qala xebata fermandar Nûreddîn Sofî ya di Şoreşa Bakur û Rojhilatê Sûriyeyê de kir û wiha got: “Di sala 2013’an de dema şoreşa Rojava gihaşte asteke pêwîstiya şoreşê bi pêşengan hebû. Hem di aliyê leşkerî hem jî siyasî de tecrubeyên xwe hebûn. Ji ber wê me heval Nûreddîn vexwend şoreşa Rojava. Hem di aliyê civakî û hem siyasî de pêşengî kir. Di pêşxistina Rêveberiya Xweser de cih girt. Di pergala me ya civakî û rêxistinî de, di navbera salên 2013-14-15’an de pêşketinên ku çêbûn destpêka avakirina pergala me ya civakî bûn. Heval Nûreddîn roleke pêşeng lîst. Ji ber xwedî proje bû, baweriya gel û hevalan pê hebû. Ev jî sedema yekem a serkeftina wî bû. Têkiliya pêkhateyên Kurd, Ereb, Siryan û hemû pêkhateyan çêdikir. Bi rastî ji 2013’an heta roja şehîd ket em dikarin bêjin roleke xwe ya pêşeng di hemû qadên Şoreşa Rojava de hebû.”
‘WÎ MOHRA XWE LI TUNEKIRINA DAIŞ’Ê DA’
Fermandar Nûreddîn Sofî di dawiya 2016’an destpêka 2017’an derbasî xebatên leşkerî dibe û di têkoşîna li dijî DAIŞ’ê de roleke aktîf dilîze. Mazlûm Ebdî li ser têkoşîna wî ya li dijî DAIŞ’ê wiha dibêje: “Di pêngavên me yên li dijî DAIŞ’ê de hertim rolekî mezin lîst. Pêngava rizgarkirina Reqayê operasyona me ya herî zemhet bû. Ew kelha DAIŞ’ê û paytexta wan bû. DAIŞ’ê gelek tedbîr girtibûn. Di pêngava rizgarkirina Reqayê de biryardariya heval Nûreddîn, di meşandina şer de rolekî xwe yê sereke hebû. Dema şer dixetimî teqez jêrê çareseriyek didît. Di tunekirina DAIŞ’ê li Baxoza Dêrazorê de jî Heval Nûreddîn fermandariya şer kir. Wî mohra xwe li tunekirina DAIŞ’ê da. Gelê me, tevayî pêkhateyên Bakur û Rojhilatê Sûriyeyê di mijara xilaskirina ji terora DAIŞ’ê de minetdarê heval Nûreddîn Sofî ne.”
‘DI OPERASYONA LI DIJÎ EL BEXDADÎ DE BI ROLEKE SEREKE RABÛ’
Fermandar Mazlûm Ebdî agahiyeke din jî da û got: “Heval Nûreddîn di operasyona kuştina serçeteyê DAIŞ’ê Ebû Bekir El Bexdadî de roleke sereke lîst. Agahî hebûn lê hinek hevalan digotin ne rast in. Yê ku bi israr şopand û teqez kir heval Nûreddîn bû. Bi xwe teqez kir û hişt ku bibe biryara QSD û koalîsyonê. Mîmarê serkeftina operasyona li dijî Bexdadî heval Nûreddîn bû. Di fermandariya me de yê meşandî ew bû.”
Mazlûm Ebdî anî ziman ku fermandar Nûreddîn di şerê Efrîn, Serêkaniyê û Girê Spî de jî cih girt û pêşengî kir.
Mazlûm Ebdî anî ziman ku şehîd Nûreddîn di encama êrişeke balafirê ya dewleta Tirk de şehîd ket û gotinên xwe wiha bi dawî kir: “Şehadeta wî ji Tevgera Kurd a Rojava, tevahî pêkhateyên Sûriyeyê re zirareke mezin e. Helbet dê bandoreke xwe hebe. Lê em ê wek hevalên wî têkoşîn û armanca wî bigihînin serkeftinê.”
