Projeya ku Wezîrê Maliyeyê yê Îsraîlê Bezalel Smotrich piştgiriya wê dike, wê Şerîa Rojava bike du parçe û bi vî rengî yekparebûna xaka dewleta Fîlîstînê ya gengaz têk bibe.
Nûnera Bilind a Têkiliyên Derve ya Yekîtiya Ewropayê Kaja Kallas roja Pêncşemê daxuyaniyek da û bang li Îsraîlê kir ku dest ji plana ‘E1’ berde.
Kallas got, “Biryara meqamên Îsraîlê ya ji bo bipêşvebirina plana wargeha E1, çareseriya bi du dewletan têk dibe û tê wateya binpêkirina hiqûqa navneteweyî” û hişyarî da ku ev gav wê bi xwe re “encamên berfireh ên mezin” bîne.
Wezareta Karên Derve ya Elmanyayê jî li ber projeyê rabû û bang li hikumeta Îsraîlê kir ku avakirina wargehên li derveyî qanûnan ên li Şerîa Rojava rawestîne.
Wezaretê got, “Em daxuyaniyên hikumeta Îsraîlê ya ji bo erêkirina bi hezaran avahiyên nû li wargehên Îsraîlê yên li Şerîa Rojava bi şênberî red dikin.”
Li gorî projeyê, Îsraîl wê li Şerîa Rojava 3 hezar û 400 avahiyên nû lê bike. Beşeke mezin a civaka navneteweyî diyar dike ku ev wargeh hem li dijî hiqûqa navneteweyî ye, hem jî wê pêvajoya aştiyê ya navbera Îsraîl û Fîlîstînê bi rengekî welê têk bibe, ku neyê çareserkirin.
