Bîlançoya herî giran li eyaleta Hayber-Pahtunkhwa rû da ku çiyayî ye û li ser sînorê Efganistanê ye.
Li vê derê 43 kesan jiyana xwe ji dest dan ku 8 ji wan zarok, 2 jî jin bûn. Li herêma Bajaur a li eyaletê, 18 cenaze ji binê enqazê xaniyan hatin derxistin ku ji ber barana zêde hilweşiyan. Li Lower Dir’ê jî 15 kesan jiyana xwe ji dest dan. Li herêma Keşmîrê jî 7 kesan jiyana xwe ji dest dan.
Bi vî rengî ji dawiya meha Hezîranê û vir ve ji ber barana mûsonê ‘ya ne ji rêzê’ 350 kesan jiyana xwe ji dest dan.
Rayedaran diyar kirin ku meha Tîrmehê li eyaleta Pencapê li gorî salek beriya niha ji sedî 73 bêhtir baran bariya û tenê vê mehê ji temamiya dema mûsonê ya sala derbasbûyî bêhtir mirovan jiyana xwe ji dest dan. Mûson wê heta rojên navîn ên Îlonê dewam bike. Hişyarî tê dayin ku hefteyên bê hîn giran bibe.
Baranên mûsonê li Başûrê Asyayê ji bo bi milyonan cotkaran gelekî girîng e, lê belê bi bandora guherîna avhewayê re dibe sedema lehiyên hilweşîner. Sala 2022’an di dema mûsonê de ji sê parên Pakistanê parek di nava avê de ma bû. Di encamê de 1.700 kesî jiyana xwe ji dest dabûn, 33 milyon mirov jê bi bandor bûbûn.
