Navenda Ragihandinê ya Hêzên Parastina Gel (HPG) 11`ê Tebaxê ragihand ku fermandarê şoreşa azadiyê yê Rojava û gelê Bakur û Rojhilatê Sûriyeyê Nûreddîn Sofî 6`ê Nîsana 2021`an dema diçû çiyayê Garê yê Başûrê Kurdistanê şehîd bûye.
Endama Desteya Serokatiya Partiya Yekitiya Demokratîk (PYD) Foza Yûsif der barê şehadeta şehîd Nûreddîn Sofî axivî. Foza sersaxî da malbata şehîd, gelê Kurd û gelên herêmê û destnîşan kir ku çûyîna wî, windahiyeke mezin e ku kesayeteke biha û bi qîmet bû û ji bo azadiya gel û doza wî, jiyana xwe borand.
DI ŞOREŞA ROJAVA DE ROLEKE PÊŞENG
Foza behsa dîroka têkoşîna fermandar Nûreddîn Sofî kir û got: “Xwedî dîrokeke demdirêj a dîroka şoreşa Kurdistanê ye. Di şoreşa Rojava de, roleke pêşeng û sereke lîst. Di hemû qadên leşkerî, civakî û rêxistînî de cih girt.”
‘FERMANDAREKÎ MODERN Ê XWEDÎ TAYBETMENDIYÊN ŞOREŞGERÎ BÛ’
Der barê taybetmendiyên fermandar Nûreddîn Sofî de Fozayê got: “Xwedî rêyeke şoreşgerî ya resen bû. Di dîroka têkoşînê de mohra wî diyar bû. Ji gel û hevalên xwe re dilsoz û wefedar bû. Rêber Abdullah Ocalan wiha fermandar Nûreddîn Sofî wesifandiye; heval û dostê hevalên xwe bû. Fermandarekî modern ê dilnizim bû. Bi cesaret bû û gotin dikir, kirin.”
Foza wiha domand: “Her tim hewl dida xwe pêş bixe. Di ramanê de rêber bû û mînak bû. Di têkoşîna çiyayan de di nava gerîlayan de xwedî tecrubeyeke demdirêj bû. Her tim hewl dida pêşengê yên dixwazin gelê xwe pêş bixin û bi rêxistin bikin.”
‘HER KES JÊ HEZ DIKIR’
Foza piştrast kir ku şehîd Sofî, şoreşgerê projeya neteweya demokratîk bû, ji tevahî gelan bi duristî hez dikir, hezkirina wî ji gelên herêmê re diyar bû, ti cudahî nedikir navbera kêmneteweyan de, ne tenê ji bo gelekî tê koşiya lê belê şoreşgerê mirovahiyê tev da bû lewma her kes, kurd û ereb rêz jê re digirtin, jê bawer dikir.
Foza destnîşan kir ku şehîd Sofî di qada leşkerî û birêxistinkirina civakê de xebat meşand û ev li gotinên xwe zêde kir: “Di gelek cihan de, tê koşiya. Fermandar bû û di heman demê de di bi rêxistinkirina gelê xwe de, pêşeng bû.”
‘DAMEZIRÎNERÊ RÊVEBERIYA XWESER Û YPG`Ê’
Foza bi bîr xist ku sala 2013`an, bi destpêkirina şoreşa Rojava re, şehîd Sofî gel bi rêxistin kir, di avakirina Tevgera Civaka Demokratîk (TEV-DEM) û Rêveberiya Xweser de roleke bingehîn lîst, pêşengê pêxşstina Yekîneyên Parastina Gel (YPG) û xurtkirina wê bû, li ser parastina şêniyan ji êrişan şahid bû û rolek di pêşxistina saziyên parastinê de lîst.
Foza got: “Dema mijar parastina gel ji komkujiyan bû, bi cesaret û biryardar bû. Bê teredud, qehremantiya pêwîst nîşan da.”
‘PÊŞENGÊ DAMEZIRANDINA KOMÎNAN Û BIRÊXISTINKIRINA CIVAKÊ BÛ’
Foza îşaret bi rola wî di birêxistinkirina civakê de kir û wiha pê de çû: “Hevalê Sofî di damezirandina komînan sala 2013`an de û birêxistinkirina ciwanan û beşên civakê de roleke sereke lîst.”
‘DOSTÊ RASTÎN Ê JINAN BÛ’
Foza vegotina taybetmendiyên şehîd Sofî wiha domandin: “Dostê durist ê jinan bû. Nêzîkatiyên dûrxistina wê red kirin. Di têkoşîna xwe de eleqedariyeke mezin nîşanî tevgera azadiya jinan da û rêz ji vîn û têkoşîna jinan re girt. Piştevanê rastîn ê xurtkirina jinan di têkoşînê de bû. Xwedî giyanê edalet, wekhevî û sosyalîzmê bû.”
‘SEMBOLA DILNIZMIYÊ KU ZEHMETÎ NAS NEDIKIR’
Foza Yûsif diyar kir ku fermandar Nûreddîn Sofî, dilnizm bû heta ku di exlaqê û asilzadiyê de, pêşeng bû, ji tiştekî neditirsî, bûyer baş analîze dikir û jê tecrube digirt, di rexne û xwe rexnekirinê de, bi cesaret bû, pêşxerê şoreşê bû, ji bo biserxistina wê xwedî nêrîn û rêbaz bû.
‘TÊKILIYÊN ENTERNASYONALÎST SÎNOR DERBAS DIKIN’
Foza Yûsif anî ziman ku têkiliyên fermandar Nûreddîn Sofî asta civaka xwecih derbas kirine, têkiliyên wê bi hevalên enternasyonalîst ên ji derve dihatin, xurt bû û xwedî taybetmendiyeke sereke ya enternasyonl bû ku bi şervanên tirk û biyanî yên ji rojava tên re jiya, hewl da wan û hestên wan fêm bike û di vî warî de kedeke mezin da.
‘ZÎREK BÛ Û XWEDÎ TEKTÎKA PÊŞXISTINÊ BÛ’
Foza wiha behsa taybetmendiyên din ên fermandar Sofî kir: “Zîrek bû, dikarî helwestan analîz bike û fêm bike. Di taktîkên şer û pêşxistina wê de, jêhatîbû. Pirsgirêk çareser dikirin. Di şoreşa neteweyî ya Kurdistanê, qadên Amed, Zagros, Rojava de tê koşiya. Di hemû qadan de pêşeng bû û ji tiştekî neditirsî.”
‘BERJEWENDIYA GEL DI SER HER TIŞTÎ RE YE’
Foza diyar kir ku şehîd Nûreddîn Sofî, her tim doza gelê xwe di ser her tiştî re digirt û dûrî takekasiyê li gorî giyanî komî kar dikir û xwedî eqilmendiyeke civakî bû.
Foza destnîşan kir ku şehadeta fermandar Nûreddîn Sofî, ji bo gelê Kurd û gelên netewa demokratîk windahiyeke mezin e ji ber ku yek ji zarokên xwe yên herî asilzad ji dest dan, li dû xwe mîraseke têkoşînê hişt ku dikarin wê pêş bixin, evîndarê jiyanê bû, tijî enerjî bû, qet ranediwestiya, lewma Foza got ew ê taybetmendiyên wî bikin islûba jiyan û kesayeta xwe.
Foza di dawiyê de got: “Dostaniya wî dê ji bo me pirek bimîne ji bo ku bi rêya wê em ê projeya netewa demokratîk bi ser bixin. Cesaret û qehremantiya wî dê têkoşîna me ronî bike. Em soz didin wî ku têkoşîna wî temam bikin ta ku serkeftinê bi dest bixin.”
