Qeza, li navçeya Guzara ya bajarê Heratê çêbû. Polîsan da zanîn ku qeza ji ber ‘’leza zêde û baldarnebûna şofêrê otobusê’’ çêbûye. Otobus ji rê derketiye, pêşiyê li motorsîkletekê xistiye û piştre jî li kamyoneke petrol barkirî qelibiye û di encamê de şewateke mezin derketiye.
Li gorî rayedaran, herî kêm 76 kesan jiyana xwe ji dest dane û sê birîndarên giran jî rakirine nexweşxaneyê. Hate ragihandin ku ji 76 kesên ku jiyana xwe ji dest dane 19 zarok in.
Hate ragihandin ku otobus ya penaberên Efxan bû ku ji Îranê vedigeriyan welatê xwe. Otobus li deriyê sînor Islam Kaleyê bi rê ketibû û ber bi Kabilê ve diçû. Qeza di dema kampanyaya Îranê ya şandina 4 milyon penaberên Efxan de çêbû.
Li Efxanistanê gelek caran qezayên trafîkê çêdibin. Li gorî pisporan qeza ji ber nebaşbûna rêyan, baldarnebûna şofêran û kêmbûna mekanîzmaya çavdêriyê çêdibin. Di Kanûna 2024’an de jî li navenda welêt di encama du qezayên cuda de 52 welatiyan jiyana xwe ji dest dabûn.
