Konseya Rêveber ya Kongreya Neteweyî ya Kurdistan (KNK) têkildarî bûyera ku şeva borî li Silêmaniyeyê qewîmî û rê li ber windakirina canî vekir, daxuyaniyekî nivîskî weşand. Di daxuyaniyê de hate diyarkirin ku geşedanên diqewimin ne tenê li bajêr li herêmên derdor jî bêaramiya civakî çêdike û wiha got, “Herêma Kurdistanê ji krîzekî kûr derbars dibe.”
Di daxuyaniyê de hate destnîşankirin tevî ku 10 meh bi ser hilbijartinan derbas bûye jî parlamentoyeke nû nehatiye avakirin û ev jî krîzê kûrtir dike û wiha hate gotin: “Mixabin, duh şev li başûrê Kurdistanê, bûyerên nexwestî li Silêmaniyê çêbûn û di encama de rewşa bajêr û devera derdor bi temamî naseqamgîr bû. Tevî qurbaniyan, nîgeranî – fikar û tirsa xelkê jî çêbû. Ev di demekê de ye ku başûrê Kurdistanê di krîzek kûr a navxweyî re derbas dibe. Ev zêdetirî 10 meh piştî hilbijartinan, ne parlamento û ne jî hikûmeta nû hatiye pêkanîn. Pirsgirêkên aborî û şert û mercên jiyara xelkê nehatine çareserkirin. Pirsgirêkên bi Hikêmeta fedral re hê berdewamin û metirsî li ser statûya herêma Kurdistanê berdewame.
Li şûna ku ji bo serweriya yasa – qanûnê bixebitin û pirsgirêkên navxweyî bi diyalog û têgihîştinê çareser bikin, tundiyê bikartînin. Rewşek wisa ne tenê xizmeta doza Kurdistanê nake, lê di heman demê de di nav civaka xelkê kurdistanê de tirs û fikaran zêdedike û statuya herêmê bêtir rûbirûyê metirsîyê dike. Parastin û aramiya herêmê berpirsiyariya me hemûyan e.”
Di berdewamiya daxuyaniyê de wiha hate gotin: “Pirsgirêkên ku wek arîşeyên navxweyî yên li Kurdistanê derdikevin, xetereyên mezin hilgiritine. Ji ber ku Kurdistan niha di qonaxeke hesas û girîng ya Rojhilata Navîn de derbas dibe, girîngiya stratejîk ya Kurdistanê li vir roj bi roj zêde dibe. Di encamê de, hem ew derfetên dîrokî û hem jî xetereyên cidî yên li pêşiya me ne, bi heman şêwe bêtir dibin. Divê were zanîn ku gelek hêzên ku dijberîya gelê me dikin, li derfetan wiha digerin da ku pirsgirê û nakokîyên me girantir û kûrtir bikin.
Em Kongreya Neteweyî ya Kurdistan KNK’ê, sersaxiyê ji malbatên qurbaniyan re dixwazin û ji birîndaran re jî şîfayê dixwazin. Em daxwaz dikin ku pirsgirêkên herêma Silêmaniyê di zûtirîn dem de bêne çareserkirin û bûyerên bi vî rengî bi diyalog û bi rêyên sivîl û bi rêkarên qanûnî yên bêalî bêne çareserkirin. Her wiha pêwîste û divê, hêz û partîyên li başûrê Kurdistanê, rêkxistiyên civaka sivîl, rewşenbîr û rojnamevan û tevahiya gelê me yê başûrê Kurdistanê piştrast bin ku ew dikarin di hawirdorek azad, demokratîk û aram de kar û xebata xwe berdewam bikin.”
