Tevgera Jinên Azad (TJA) bang kir ku di pêvajoya amadekirina destûra bingehîn a nû de jin jî tevlî komîsyonê bibin û bi vê armancê bi dirûşma ‘Hiqûq nebe çareserî nabe, jin nebe hiqûq nabe’ bi navê ‘Komîsyona Jinan û Destûra Bingehîn’ ava kir. Komîsyon bi daxuyaniyekê hate ragihandin û işaret bi rola jinan a di pêvajoya aştiyê de hate kirin.
Hate destnîşankirin ku nîqaş û amadekariyên li ser destûra bingehîn a nû bêyî jinan nabe û hate gotin, jin wê bi gotin û têkoşîna xwe bi rengekî çalak beşdarî her qada pêvajoyê bibin.
Aktîvîsta TJA’yê parêzer Sevda Çelîk Ozbîngol li ser gavên ku komîsyon di vê pêvajoyê de divê biavêjin û girîngiya ku jin didin têkoşîna aştiyê ji ANF’ê re nirxand.
Sevda Ozbîngol anî ziman ku li erdnîgariya Kurdistan û Tirkiyeyê pêwîstiya herî lezgîn û jiyanî aştî ye û destnîşan kir ku paşeroja demokratîk û aştiyane divê bi pêşengiya jinan bê avakirin. Sevda Ozbîngol diyar kir ku jinan encamên herî giran ên şer dîtin, lewma yên ku li ser aştiyê biaxivin jî divê jin bin.
Sevda Çelîk Ozbîngol bi dewamî got, “Banga aştiyê xwe dispêre pêwîstiya jiyanî û lezgîn a li cografyaya me, xwe dispêre pêwîstiya bi avakirina aştiya civakî. Ev bang ne tenê li Kurdistanê yan jî Rojhilata Navîn e, bang li tevahiya cîhanê ye. Ev nêzîkatiya hem ji tespîtan hem jî ji çareseriyan, çareseriya demokratîk a pirsgirêka Kurd ku birîna me ye, ferz dike.
Bêguman êşa rastiya şer herî zêde jinan kişandine. Lewma xwediyê aştiyê, her wiha yên ku mafê xwe hene li ser aştiyê biaxivin, jin bi xwe ne. Em jin ne weke nîvê civakê; lê weke hêmana esasî ya avakirina paşeroja aştiyane ya civakê li xwe dinihêrin.”
‘BEŞA HERÎ ÇALAK A PÊVAJOYÊ JIN E’
Sevda Ozbîngol ragihand ku jin ên ciwan, jin ên kedkar û karker, dayik û jinên ji her beşên civakê hêmana esasî ya têkoşîna aştiyê ne û got, “Eger aştiyek wê pêk were di nava vê de divê teqez jin hebin. Yên ku bi navê jinan biaxivin jî jin bi xwe ne. Em neçar in karekî welê bikin ku gotin, temsîliyet û rola jinan a di nava aştiyê de serwer bike. Bêyî jinan pêvajoya aştiyê nameşe.”
‘BÊYÎ GOTINA JINAN CIVAKA DEMOKRATÎK NIKARE BÊ AVAKIRIN’
Sevda Ozbîngol diyar kir ku ew cihêrengiya jinan jî weke dewlemendiya vê pêvajoyê dibînin û bi vî rengî dewam kir: “Em destketî û cihêrengiya jinan gelekî girîng dibînin. Eger peymaneke civakî wê bê kirin, tevlîbûna jinan a li vê yekê ferz e. Peymana civakî ya nû xwedî karên jiyanî yên sereke yên têkildarî ekolojî, hawirdor, aborî, rastiya girtîgehan û kuştina jinan hene. Bêyî gotin û keda jinê civakeke demokratîk nikare bê avakirin.”
‘EV PÊVAJO DIVÊ BI PIŞTEVANIYÊ BI PÊŞ VE BIÇE’
Sevda Ozbîngol işaret bi danhevî û berpirsyariya dîrokî ya jinan a li ser pêvajoya aştiyê kir û axaftina xwe bi van gotinan dewam kir, “Rastiya têkoşîneke jinan heye ku îro xwe ispat kiriye. Em ji vî alî ve di mijar paşeroja demokratîk a cografya û welatê xwe de hem xwe berpirsyar dibînin hem jî tevkariya li vê yekê weke maf û wezîfeya xwe dibînin. Li gorî me, jin hemû -Jinên Kurd, Tirk, Ereb, Çerkes, Elewî, jinên ji hemû reng û cihêrengiya vê cografyayê- divê bi piştevaniyê nêzî vê pêvajoyê bibin.”
‘EM DEST BIDIN HEV Û AŞTIYÊ AVA BIKIN’
Sevda Çelîk Ozbîngol herî dawî bang li jinan kir, “Em îro destpêkeke nû diafirînin. Em di wê baweriyê de ne ku ji niha û pê ve hem li qada siyasî û civakî hem jî li zemînên hevpar ên kar bi hevkarî, piştevanî û tifaqên jinan ên nû em dikarin dest bidin hev û paşerojeke aştiyane ava bikin.
Banga me li jinan hemûyan e: Werin em bi reng, gotin, keda xwe paşerojeke aştiyane û demokratîk bi hev re ava bikin.”
