Meş ji ber avahiya Meclisa Xweseriya Şengalê ya li Geliyê Kersp dest pê kir û heta Baxçeyê Rêber Apo berdewam kir. Di meşê de al û posterên Rêber Apo hatin bilindkirin û dirûşmeyên “Bijî Serok Apo” û “Bê Serok jiyan nabe” hatin berzkirin.
Piştî ku girse gihaşt baxçe, ji bo rêzgirtina hemû şehîdên têkoşîna azadiyê, deqeyek rêz girtin. Piştî rêzgirtinê, Hevseroka Meclisa Xweseriya Şengalê Cîhan Celo daxuyanî da û diyar kir ku ew wek pêkhateyên Şengalê heta dawiyê bi gavên Rêber Apo yên ji bo pêkanîna aştiyê re ne.
Di daxuyaniyê de Cîhan Celo wiha got: “Îro li seranserê cîhanê wek Roja Aştiyê ya Cîhanê tê binavkirin. Em wek gelê Şengalê, Êzidî, Ereb û hemû pêkhateyên din, tevahiya şehîdên ku di xeta aştî û azadiyê de canê xwe dane bi rêzdarî bibîrtînin. Em didin diyarkirin ku mîmarê aştiyê îro li Rojhilata Navîn Rêber Apo ye. Rêberî ji bo ku aştî pêk were her dem di nava hewldanan de ye û destpêkirina banga aştiyê û civaka demokratîk jî nîşana vê yekê ye. Rêbertî bi vê bangê careke din diyar kir ku gelê Kurd û taybet tevgera azadiyê aştîxwaz in û ji bo aştî pêk were têkoşîn dikin. Rêber Apo bi boneya vê rojê peyamek şand û diyar kir ku aştî ne tenê bi bêdengkirina çekan pêk tê, lê belê bi gavên şênber ji bo azadiya gelan, aştî dikare pêk were.”
Cîhan Celo wiha berdewam kir: “Em wek xelkê Şengalê û taybet civaka Êzidî yek ji civakên azadîxwaz in û ji her kesî zêdetir dixwazin bi aştî bi hemû pêkhateyên din re bijîn. Dibe ku niha li Şengalê şer tune be, lê lazim e em nebêjin li Şengalê aştî heye, ji ber ku heta niha mafê gelê me nehatiye dayîn û hê jî desthilatdarî dixwaze îradeya me tine bike. Ev yek wek aştî nayê destgirtin.”
Cîhan Celo wiha bi dawî kir: “Ji bo ku aştî pêk were, her kesek li ser axa xwe bi çand û zimanê xwe azad bijî, pêwîst e destek bide banga Rêber Apo û Rêber Apo azad bibe.”
Piştî daxuyaniyê, meş bi dirûşmeyên “Bê Serok jiyan nabe” û “Jin Jiyan Azadî” bi dawî bû.
