Beriya niha bi giştî 30 sal cezayê girtîgehê li Ayşe Gokkan hatibû birîn. Dadgeha Bilind cezayê ku hem bi sûcdariya ‘endametiya rêxistinê’ hem jî bi sûcdariya ‘alîkariya rêxistinê’ ya ji ber heman çalakiyan xera kiribû.
Ayşe Gookkan bi rêya SEGBÎS’ê beşdarî rûniştina li Dadgeha Cezayê Giran a 9’emîn a li Amedê bû.
Endamên malbata Gokkan, Parlamentera DEM PartiYê ya Mêrdînê Salîha Aydenîz, endamên TJA’yê, nûnerên gelek partiyên siyasî û rêxistinên civakî yên sivîl rûniştin şopandin.
Ayşe Gokkan parastina xwe bi Kurdî kir, anî ziman ku pêvajo bêhiqûqî ye û got, “Rojhilata Navîn dişewite, naxwazim welatê me di nava vî êgirî de bişewite. Ji bo welatê me neşewite divê aktorê Pêvajoya Aştî û Civaka Demokratîk Birêz Ocalan azad be. Divê şert û mercên Birêz Ocalan azad be.”
Ayşe Gokkan her wiha diyar kir ku astengkirina Dayikên Aştiyê şaş e û destnîşan kir ku karên demokratîk-azad ên jinên Kurd nabe ku sûc bê dîtin.
Parêzeran diyar kirin ku Ayşe Gokkan 5 sal in girtî ye, pirsgirêkên xwe yên tenduristiyê hene, hemû delîl di nava dosyayê de ne û xwest bê berdan.
Lê belê dadgehê guh da dozger ku dixwest girtî bimîne û biryar da ku girtî bê hiştin, rûniştina dozê jî ji bo 30’ê Kanûnê taloq kir.
