Koalîsyona ‘Viv ansanm’ (Jiyana bi hev re) ya ku çeteyan li Haitiyê ava kirine, hefteya derbasbûyî êriş bir ser sivîlên li herêma Cabaretê ya li nêzî paytext Port-au-Princeyê û herî kêm 50 kes qetil kirin.
Li gorî rapora rêxistina mafên mirovan a xwecihî RNDDH, di êrîşê de gelek mal hatin şewitandin û cesedên hin qurbaniyan bi rojan nehate dîtin.
Li herêmê ku ji Adara 2024’an û vir ve di bin kontrola çeteyan de ye, tê gotin ku bi îdîaya ‘hevkarî bi polîsan re kirine’ êrîş li sivîlan hate kirin. Beşek ji mirovên bi saxî ji komkujiyê rizgar bûn xwe li wargehên derdorê bi cih kirin, hinekan jî hewl dan bi rêya deryayê birevin.
Konseya Serokatiya Demkî ya Haitiyê êrîş bi ‘barbarî’ pênase kir. Sekreterê Giştî yê Neteweyên Yekbûyî Antonio Guterres jî êrîş şermezar kir û ji bo xurtkirina Mîsyona Ewlekariya Pir Neteweyî bang kir.
Haiti ku welatê herî xizan ê parzemîna Emerîkayê ye, demeke dirêj e bûye qada tundiya çeteyan, lê belê rewş ji destpêka sala 2024’an û pê ve hîn nebaş bû.
Li gorî Neteweyên Yekbûyî, komên çekdar ku ji sedî 90 ê paytext Port-au-Prince kontrol dikin, serokwezîrê demê Ariel Henry neçarî îstifayê kiribûn.
