Koordînasyona Komalên Ciwan fermandar Rohat Rover (Azad Akinci) di salvegera yekemîn a şehadeta wî de bi bîr anî ku 10’ê Îlona 2024’an de di êrîşa hewayî ya dewleta Tirk de şehîd bû.
Daxuyaniya Koordînasyona Komalên Ciwan bi vî rengî ye:
“Em wekî Tevgera Ciwanên Apoyî di yekemîn salvegera şehadeta; sembola mutewazîbûn û sekna Apoyî fermandarê me yê ciwan Rohat Rover bi rêzdarî û minetdarî bi bîr tînin û di şexsê Rohat Rover, Ezîz Ereb û Helo Dersim de, em bejna xwe li beramber bîranîn û fedaîbûyîna hemû şehîdên şoreşê ditewînin. Dibêjin ku meşaleya wan pêxistiye û pêşiya ciwanan ronî kiriye, em ê bi wê ronahiyê bibezin serketinê û xeyalên wan ê Kurdistana azad pêk bînin.
Tevgera Apoyî ya ku bi ciwantî dest pê kir û tovê xwe li her derê reşand, bû şitil û îro bi sekna fedayiyên weke Rohat Rover ew şitil mezin bû, bû darek mezin ku her ciwan ji bo xwe bi rêxistin bike, ji fêkî û berhemê wê sûd werdigire. Heman demê xislet û cewhera Tevgera Apoyî ya li ser nirxên dîroka civakî şîn bibû îro berbelavî her derê bûye. Wekî nûnertiya hemû gelên bindest bi pêşengtiya jin û ciwanan de gerdûnî dibe. Bêguman ew meşa 52 salan di nav şerek dijwar de hate meşandin, bi berdêlên giranbûha gihîşt roja me ya îro. Yek ji wan lehengan jî, heval Rohat bû ku, 20 salan bêy navber bi ruh û dînamîzma ciwantiya Apoyî fermandartî û pêşengtî kir.
Hîn di zarokatiya xwe de ji ber êrîşên dagirkeriya dewleta Tirk bi koçbertiyê re rû bi rû ma û ev yek hêrsek mezin di heval Rohat de avakir. Ew hêrs di giştî jiyana wî de dibe sedema mezin kirina têkoşînê. Di temenê xwe yê ciwan de taybetmendiyên wî yên pêşengtiyê xwe didin der. Di pêngava “ÊDÎ BESE” de pêşengtiya qebûlnekirina tecrîda li ser Rêber Apo û êrîşên li ser gelê Kurd dike. Bi rihekî serhildêr hezaran ciwanên Kurdistanê seferberê serhildanan dike. Di kolan û taxên Kurdistanê de nefes girtina dagirkeriyê heram dike. Bi vê girêdan û biryardariya xwe ya bi welat û axê ve, bû yek ji sembola ciwanên Kurd ê wêrek, bêtirs û çavreş.
Egîdê hemdem û lehengê ciwan her cihê ku çûyê, cewherê milîtantiya Apoyî jiyan kir û da jiyan kirin. Heval Rohat di giştî meş û jiyana xwe ya şoreşgerî de şopên mayînde di dil û bîra gelê me yê welatparêz de hişt. Di her gavek xwe de baweriya serketinê di nava heval û hogirên xwe de xurt kir. Tekoşîna xwe ya li Bakurê Welat dayî destpêkirin, li Başûr, Rojhilat, Mexmûr û Rojava di asta pêşengtiyê de meşand. Bêyî navber 16 salan di xebatên ciwanan de di asta herî jor de berpirsyartiyên mezin girt ser xwe û di kîjan xebatî de cihgirtibe jî ew îradeya ciwanan parast û ji bo nasnameya ciwanan avabibe kedekî bêhempa da. Di pêvajoyên herî dijwarde ku dijmin biryara tunekirina têkoşîna ciwanên Apoyî dabû, Şehîd Rohat wekî mertalek îdeolojîk tevgeriya û bû parêzvanek serketî yê xeta milîtantiya Apoyî. Bi rihek fetihkar li ser dijmin de çû û êrîşên wan vala derxist. Bi hêz û sekna xwe ya rêxistinî, dilnizimî û wêrek fermandartiya rast fêrî me kir.
Bi taybetmendiyên xwe yên herikbar, kedkar û civakî li hemû parçeyên Kurdistanê ji bo azadiya gelê Kurd şer û xizmet kir. Çavkaniya hêza heval Rohat jî hezkirin û girêdanbûyîna wî ya ji Rêber Apo re bû. Bi kûrahiya xwe ya di îdeolojiya Apoyî de hezaran ciwanan perwerde kir û berê wan da nav refên azadiyê. Di asta jor de hîskirina rastiya Rêber Apo hişt ku vê heqîqetê derî bi derî belav bike. Hêrsa xwe ya li beramberî komploya navneteweyî vegerand rêxistinkirin û tevlîkirina gel a nav refên têkoşînê. Sekna ku karîbû li her çar parçeyên Kurdistanê pêşengtiyê bike, di esas de karaketerê wî yê gerdûnî bû. Wekî derwêşekî jiyan kir û bi hevaltiya xwe, xwe gihand asta kamilbûnê.
Tişta herî zêde di şexsê heval Rohat de xwe dida der bandorbûna rêhevaltiya bi hevalên jin re bû. Sekna zilamê klasîk û feodal ji xwe re qebûl nekir li beramberî vê, sekna Fikrî Baygeldiyan a zilamê azad ji xwe re esas girt û li ser vê esasê têkoşiya. Pîvana serketinê di nav ruhê hevpar ê xeta azadiya jinê de dît. Li ser vê esasê karîbû bi hemû hevalên jin re hevaltîya rast avabike.
Pêwîste baş were zanîn ku her pêvajoya pêşdikeve bi encama têkoşîna gelê Kurd û bi fedayiyên wekî Rohatan, bi keda hezaran şehîdên ciwan gihaye roja me ya îro. Rêber Apo bi hilgirtina înîsiyatîf û barekî dîrokî ji bo gelê Kurd û hemû mirovahiyê derfetekê pir mezin a aştiya civakî û demokratik avakir. Em wekî Tevgera Ciwanên Apoyî ji bo pêkanîna azadiya fîzîkî ya Rêber Apo soz didin ku em ê sekna Rohatan ji xwe re esas bigirin. Ji bo pêvajo bigihêje serketinê xeta fedayîtiya diyar kirî de em ê heta dawî şer û têkoşîn bikin û jiyana azad ava bikin.
Bêguman, xwedîderketina li rastiya şehîdan, bi serxistin û pêkanîna xeyal û armancên şehîdan ve pêkan e. Çawa ku heval Rohat bi cewherê koma îdeolojîk ya Apoyî meşiya û em hemû dane meşandin, niha erka hemû ciwanên Kurdistanê vê rastiyê ji herkesî re dayîna nas kirine. Wekî Tevgera Ciwanên Apoyî pêwîste li her derê ji bo jîndarkirina sekna Rohatan, di serî de ciwanên Bakurê Kurdistanê û Tirkiyeyê, li hemû qadên têkoşînê de xwedîlêderketina li keda mîrateya şehîdan wê ji bo me esas be.
Li ser vê esasê, em dubare fermandarê xwe yê nemir û mînaka kesayeta serketinê bi heskirin û minnetdarî bi bîr tînin û soza xwe ya li ser şop û mîrateya wan a pîroz, bilindkirina têkoşînê dubare dikin. Di şexsê malbata hêja ya Şehîd Rohat de dubare sersaxiyê ji hemû gel û ciwanên Kurdistanê re dixwazin û em dibêjin em ê wekî ciwanên Apoyî xwedî li mîrasa wan derbikevin.”
