Li Girtîgeha Girtî ya Jinan a Sîncanê, ji ber nirxandinên ‘halê baş’ ên Desteya Çavdêriyê ya Îdrayê, mafê berdana bi şert a girtiyên jin tê astengkirin.
Ji Çileya 2021’ê û vir ve li Girtîgeha Jinan a Sîncanê bi biryara Desteya Çavdêriyê ya Îdareyê ti ji girtiyên ku dema wan a berdana bi şert hatiye, nehatin berdan. Têkildarî ti girtiyan nirxandina ‘halê baş’ nehate kirin û destûr nehate dayin ku mafê berdana bi şert bi kar bînin.
Di halê hazir de berdana bi şert a 12 girtiyên jin tê astengkirin. Pênc ji wan 30 sal in girtî ne.
Li Girtîgeha Jinan a Sîncanê detayeke din a girîng jî ew e ku nirxandin normal sê, şeş an jî neh mehan carekê tê kirin, lê belê ji bo hin girtiyan dema nirxandinê piştî salekê hatiye dayin.
Ji Komeleya Hiqûqnasan a Azadîparêz (OHD) Parêzer Sîpan Cîzrelî bûyerên li Girtîgeha Jinan a Sîncanê nirxand.
‘JI SALA 2021’Ê Û VIR VE BERDANA BI ŞERT PÊK NEHATIYE’
Sîpan Cîzrelî anî ziman ku di sala 2020’î de bi şewba Covid-19 re guhertinên di Qanûna Înfazê de hatin kirin, bûn sedem ku di nirxandina ‘halê baş’ de cihêkarî bê kirin û got, “Di sala 2020’î de di qanûna înfazê de guhertinek hate kirin. Vê guhertinê di nirxandina halê baş de rê li ber hin cihêkariyê vekir. Du xalên qanûnê hatin guhertin, piştre jî biryarên Desteya Çavdêriyê ya Îdareyê bûn esas.
Bi vê guhertinê re ji Çileya 2021’ê û vir ve bi biryara Desteya Çavdêriya Îdareyê ya li Girtîgeha Jinan a Sîncanê ti ji mehkûmên ku dema wan a berdana bi şert hatiye, nehatiye berdan. Li gel ku ji aliyê Desteya Çavdêriya Îdareyê ve halê baş hatiye nirxandin jî têkildarî ti mehkûman nirxandineke bi esasî halê baş nehate kirin û destûr nehate dayin ku mafê xwe yê berdana bi şert bi kar bînin.
Di asta heyî de me 24 jin tespît kirin ku li gel dema wan a berdana bi şert hatiye, nehatine berdan. 12 ji wan cezayê wan piştî ku cezayê wan bi temamî qediya karîbûn ji girtîgehê derkevin.
Di halê hazir de berdana bi şert a 12 mehkûmên jin, bi nirxandinên periyodîk ên Desteya Çavdêriya Îdareyê tê astengkirin. Dema taloqkirinê ya desteyê bi giranî bi sê, şeş an jî neh mehan tê destnîşankirin, lê belê herî dawî ji bo 2 mehkûmên jin piştî salekê dem hate dayin. Yanî nirxandineke din wê karibe piştî salekê bê kirin.
Niha pênc ji jinan 12 jê bi cezayê girtîgehê yê heta bi hetayê, yke jî Sermîn Demîrdag e ku ketiye sala 34’an a girtîmayinê.”
Sîpan Cîzrelî diyar kir ku li hin girtîgehan (Weke Bolû) berdan hatibe kirin jî li Girtîgeha Jinan a Sîncanê di vê mijarê de paşve gav nehatiye avêtin û ev pêvajo bi temamî kêfî ye.
Sîpan Cîzrelî got, “Agahî li ber destê me hene ku li 1-2 girtîgehan girtî hatine berdan, li çapemeniyê jî belav bû; lê belê li Girtîgeha Jinan a Sîncanê di vê mijarê de paşve gav nayê avêtin. Bi temamî pêkanîneke kêfî heye. Weke min got, ti pîvaneke biryarên Desteya Çavdêriya Îdareyê nîne. Ev deste li hev kom dibe û hin nirxandinên subjektîf dike. Gotinên weke hev timî dubare dikin û heman biryarê didin.
Dawiya dawî berdana 12 girtiyan hate astengkirin; pênc ji wan 30 sal in li girtîgehê ne û 33-34 sal tijî kirine. Her wiha gelek ji van jinan li girtîgehê bi gelek nexweşiyan ketin.”
GIRTIYÊN JIN ÊN BERDANA WAN A BI ŞERT TÊ ASTENGKIRIN
1. Nedime Yaklav (30 sal): Berdana wê 6 caran hate taloqkirin. Nirxandina di dorê de piştî salekê ye.
2. Sermin Demirdağ (30 sal): Berdana wê 6 caran hate taloqkirin.
3. Nuriye Adet (30 sakl): Berdana wê 5 caran hate astengkirin. Nirxandina di dorê de piştî salekê ye.
4. Gülşan Adet (30 sal): Berdana wê 5 caran hate taloqkirin.
5. Hicran Binici (30 sal): Berdana wê 4 caran hate taloqkirin.
6. Zeliha Ustabaşı: Berdana wê 3 caran hate talqokirin.
7. Elif Çetinbaş: Berdana wê 2 caran hate taloqkirin.
8. Melike Göksu: Berdana wê 2 caran hate taloqkirin.
9. Esra Soyaktaş: Berdana wê 2 caran hate taloqkirin.
10. Fatma Aslan: Berdana wê carekê hate astengkirin.
11. Süheyla Taş: Berdana wê carekê hate taloqkirin.
12. Emine Abiş: Berdana wê carekê hate taloqkirin.
