Kombûna jinan ku Hevseroka Giştî ya Partiya Herêman a Demokratîk (DBP) Çîgdem Kiliçgun Ûçar, Sebahat Tûncel, Ayla Akat Ata, hevşaredar û bi sedan jin tevlî bûn, li ber avahiya DEM Partiyê ya bajarê Amedê destpê kir. Li gel dorpêça polîsan jî jinan bi dirûşmên ‘Jin, Jiyan, Azadî’, ‘Bijî Serok Apo’ û ‘Bê Serok jiyan nabe’ dest bi meşê kirin.
Jin li ber çepik, tilîlî û dirûşman gihîştin Rawestgeha Çeşmne ya Gazîlerê. Li vê derê pankarta bi nivîsa “Li dijî mejiyê komploger dem dema meşa bi ruhê berxwedanê ya ber bi azadiyê ve ye’ hate hildan û li ber dahol û zirneyê demeke dirêj govend hate gerandin.
Di daxuyaniyê de ku dirûşma ‘Mafê hêviyê nabe bê taloqkirin’ hate qîrîn, işaret bi têkoşîna azadiyê ya jinan hate kirin.
AŞTÎ NE TERCÎHEKE, MECBÛRIYETEKE
Aktîvîsta TJA’yê Sebahat Tûncel di çalakiyê de axivî û anî ziman ku jinan ji bo aştî, azadî û demokrasiyê bi salan berdêlên giran dan.
Sebahat Tûncel got, “Têkoşîna aştiyê ji bo me ne tercîhek e, mecbûriyeteke. Em çand, zimanê xwe dikarin di nava atmosfera aştiyê de ava bikin. Desthilatdaran ev daxwaza me timî tine hesibandin. Sed sal in Kurd li vî welatî daxwaza aştiyê dikin. Heta niha mixabin bersiveke bi wate nehate dayin.”
Sebahat Tûncel işaret bi komîsyona li meclîsê li ser pirsgirêka Kurd kir û got, “Du berpirsyariyên komîsyonê hebûn. Guhdarîkirina li aliyan, ev berpirsyariya destpêkê bi cih anî lê belê li Birêz Ocalan guhdarî nekirin. Heta ku li Birêz Ocalan neyê guhdarîkirin aştî nabe.”
Sebahat Tûncel got, “Hewldanek li dijî pêvajoya aştiyê heye. Ev hewldana dijber ne li aliyê Kurdan e, lê li aliyê delwetê ye” û destnîşan kir ku Kurdan her tim alîgiriya xwe ya ji bo aştiyê anîn ziman.
TECRÎDA LI SER ABDULLAH OCALAN GEFA LI SER AŞTIYÊ YE
Sehahat Tûncel got, “Yek ji tiştên ku divê dewlet bike afirandina şert û mercên azad ên aliyan e” û bi vî rengî dewam kir, “Dewlet di nava şert û mercên azad de dixebite, lê belê ev rewş ji bo aliyê Kurd bi heman rengî nîne. Bû salek, lê belê li Îmraliyê hîn jî polîtîkayên tecrîdê dewam dike, ev tecrîd tecrîdkirina aştiyê ye. Ji ber vê yekê em ber bi Enqereyê ve dimeşin. Em ê li Enqereyê bibêjin, ‘Azadiya Birêz Ocalan azadiya gel e’. Birêz Ocalan di hevdîtinekê de got, ‘Azadiya min di azadiya gel de ye. Azadiya xwe bi tenê naxim rojevê’. Birêz Ocalan azadiya xwe di azadiya gelê Kurd de dibîne. Em Kurd, em jinên Kurd jî azadiya xwe di azadiya Birêz Ocalan de dibînin. Ev şert nîne, pêwîstî ye. Heta ku azad nebe aştiyeke rasteqîn pêk nayê. Em dixwazin ev aştî pêk were.”
‘MEŞA AZADIYÊ WÊ DEWAM BIKE’
Sebahat Tûncel ragihand ku ji bo azadiyê ew bi biryar in û got, “Ev gel 50 sal in ji bo azadiyê meşiya, wê vê meşa xwe dewam bike Berdêl û kedeke mezin da, lê ti carî dest jê berneda. Em ewladên vî gelî ne. Em aştiyeke bi rûmet dixwazin. Em zanin ku ev yek wê bi ked û hewldanê pêk were. Ji ber vê yekê jî em ji Amedê ber bi Enqereyê ve dimeşin. Em ê daxwazên jinan ji vir werbigirin û bibin Enqereyê. Ji Amedê ber bi Enqereyê em pira aştiyê ava dikin. Meşa me ya azadiyê demeke dirêj e dewam dike, wê dewam bike.”
Axaftina Sebahat Tûncel gelek caran bi dirûşman hate birîn. Piştî daxuyaniyê jinan berê xwe dan qada ku li wesayitan siwar bibin û bi rê bikevin.
