Bi hezaran jinên ji kantona Cizîrê bi dirûşma “Azadiya fîzîkî ya Rêber Apo kilîda çareserî û aştiyê ye” meşek li bajarê Tirbespiyê li dar xist. Meş bi armanca şermezarkirina Komploya Navneteweyî ya li dijî Rêber Apo hat lidarxistin ku 9’ê Cotmeha 1998’an dest pê kiriye.
Jin bi hildana wêneyên Rêber Apo û alên Kongra Star ji deriya têketina rojhilatê bajar heya sûka navendî meşiyan. Di meşê de dirûşmên bi daxwaza azadiya fîzîkî ya Rêber Apo û şermezarkirina komployê hatin berzkirin.
Li sûka navendî deqeyekê rêz hat girtin. Piştre endama Koordînasyona Kongra Star a Bakur û Rojhilatê Sûriyeyê Gulistan Gulo axivî. Gulistanê bi bîr xist ku piştî Rêber Apo pêvajoya çareseriya pirsgirêka Kurd pêşkêş kir û hewl da bi dewletên Ewropa û cîhanê re nîqaş bike, komplo li dijî wî pêk anîn.
Gulistan Gulo got: “Em jin ên ji tevahiya pêkhateyan dizanin ku ev komplo li dijî gelên azad, bi taybetî li dijî jinan hat kirin. Em di wê baweriyê de ne ku ramanên Rêber Abdullah Ocalan xalek werçerê bû ku bi milyonan kesî bawerî pêk anîn. Bi saya ramanên wî jin azad bûne û ji bo azadiya wî ya fîzîkî tê dikoşin.”
Bi navê Meclisa Jinan a PYD’ê endama meclisê Nicûda Faris axivî û destnîşan kir ku Rêber Apo ji girtîgehê îsbat kir îradeya azad nayê şikandin û ramanên azad ji qeydan mezintir e. Her wiha got,”Rêber Abdullah Ocalan projeya neteweya demokratîk ji tevahiya gelên herêmê re pêşkêş kir.”
Nicûda Faris di dewama axaftina xwe de got: “Em ne tenê ber bi bîranînek biêş ve diçin, di heman demê de em ber bi serkeftinan ve diçin. Ji vir em soz didin Rêber Abdullah Ocalan ku em dê heya mîsogerkirina azadiyê têkoşînê bidomînin.”
Meş bi berzkirina dirûşmên bi banga azadiya fîzîkî ya Rêber Apo bi dawî bû.
