Sazî û rêxistinên Rêveberiya Xweser a Şengalê û endamên TAJÊ, bi daxuyaniyeke kurt a çapemeniyê êrişên çekdarên HTŞ’ê yên ser bi Hikûmeta Vegûhêz a Şamê şermezar kirin û piştgirî dan berxwedana taxên Şêx Meqsûd û Eşrefiyê yên Helebê.
Sazî û rêxistinên Rêveberiya Xweser a Şengalê, li ber Meclisa Gel a Digûrê daxuyaniyeke hevpar a çapemeniyê dan. Hevserokê Meclisa Gel a Digûrê Hecî Hecem bi navê saziyan axivî.
Hecî Hecem dazanîn ew sazî û meclisên herêma Şemal li Digûrê kom bûne û êrişa li dijî Şêx Meqsûd û Eşrefiyê ya dijî gel şermezar dikin û wiha axivî: “Yên 2014’an li çiyayê Şengalê êrişê Êzidiyan kirin, her ewin îro êrişê Şêx Meqsûd û Eşrefiyê dikin. Her wiha zirerê didin hemû pêkhateyên Sûriyeyê jî. Em ji van êrişkaran re dibêjin, çawa Êzidî 2014’an dijî êrişên we sekinî, parastina ax û warê xwe kir, wê xelkê Şêx Meqsûd û Eşrefiyê jî bi heman şêwazî li dijî we raweste.”
Hecî Hecem di dewama axaftina xwede diyar kir, ew piştevaniya berxwedana xelkê Şêx Meqsûd û Eşrefiyê dikin û got: ‘‘Emê heya dilopa xwîna xwe ya dawiyê li pişt gelê xwe yê Rojava bin. Ev hêzane êrişê hemû pêkhateyên Sûriyeyê Dûrzî, Elewî û Êzidiyan jî dikin. Em ji hêzên navnetewî re dibêjin, li ber vêya bigirin. Em careke din dibêjin, hunê sernekevin. Wê serkeftin ya hemû pêkhateyan be.”
