Tevgera Civaka Demokratîk (TEV-DEM) bi boneya salvegera dehemeîn a damezirandina Hêzên Sûriyeya Demokratîk (QSD) daxuyanî da.
TEV-DEM’ê diyar kir ku damezrandina QSD’ê nûnertiya jidayîkbûna nû ya avakirina civaka demokratîk û azad e û got: “Ev bone di nava reşahiya terorê, kuştina mezhebî û nîjadî ya ji aliyê hêzên herêmî û navdewletî ve li ser gelê Sûriyeyê hatibû ferizkirin, pêk hat. Damezirandina QSD’ê pêwîstiyeke dîrokî ya ji bo pêkanîna yekitiya gelê Sûriyeyê bû. Yekitiya li ser esasê nirxên demokratîk û azadiyê ye. Niha bûye zemînek ji bo pêkanîna armancên şoreşa gelê Sûriyeyê. Ew armancên bi destê ‘komên terorîst’ ên girêdayî hêzên derve û di serî de dewleta Tirk a dagirker ji destê gel hatibû girtin, vejand.”
TEV-DEM’ê di berdewama daxuyaniya xwe de bal kişand ser rola QSD’ê di têkbirina DAIŞ’ê de û ev tişt anî ziman: “Têkbirina çeteyên DAIŞ’ê ji şerê Kobanê destpê kir. Ev di sala 2014’an de bi fermandariya YPG/YPJ’ê destpê kir. Heta gihişt têkbirina çeteyan li Baxozê di sala 2019’an de.”
TEV-DEM’ê diyar kir: “Bi fikrê neteweya demokratîk a ji aliyê Rêber Abdullah Ocalan ve hatiye pêşkêşkirin, yekitiya pêkhateyên Bakur û Rojhilatê Sûriyeyê pêk hatiye. Ev bû riya sereke ya têkbirina terorê. QSD di nava xwe de Kurd, Ereb, Suryan, Ermen, Tirkmen, Xiristiyan, Êzidî û Misilman dihewîne. Di deh salan de isbat kir ku ew nûnertiya rast a tevahî gelên Bakur û Rojhilatê Sûriyeyê û tevahî Sûriyeyê dike. Bi taybet piştî hilweşîna rêjîma Baas û hatina îslama siyasî ya cîhadist li ser dika desthiladariyê ya Şamê, ev zêdetir diyar bû. Desthilata Şamê ya li dijî pêkhateyên olî yên sivîl komkujî pêk anîn.”
TEV-DEM’ê QSD di salvegera damezirandina wê de silav kir û rola şervan, şehîd û birîndarên wê ya pêkanîna destkeftiyan bibîr xist.
TEV-DEM’ê di berdewama daxuyaniyê de bang li tevahî gelê Sûriyeyê û hemû pêkhateyên wê kir ku li dora QSD’ê kom bibin û ev tişt anî ziman: “Li dora QSD’ê kom bibin û ji bo avakirina Sûriyeya nû ya azad û demokratîk pê re bibin yek. Da ku li dûrî terorê Sûriyeya nenavendî ya demokratîk ava bikin.”
TEV-DEM’ê di dawiyê de destnîşan kir ku ew ê piştgiriya xwe bi QSD’ê re bidomînin.
