Li Mêrdînê Înîsiyatîfa Yekîtiya Demokratîk a Mêrdînê “Konferansa Jiyana Hevpar a Gelan, Baweriyan û Demokratîk a li Mezopotamyayê” lidar xist. Ji bawerî û gelên cuda gelek kes tevlî konferansê bûn. Di konferansê de daxwaza çareseriya demokratîk û jiyana hevpar a gelan derket pêş.
Hevberdevka Înîsiyatîfa Yekîtiya Demokratîk Gulcan Kaçmaz Sayyîgît di destpêka konferansê de axivî û destnîşan kir ku banga Rêber Apo ya Aştî û Civaka Demokratîk, ji bo tevahî Rojhilata Navîn modela jiyaneke nû pêşkêş dike. Sayyîgît got, “Em ê jiyana nû bi civaka demokratîk ava bikin.”
Hevberdevk Mehmet Kamaç jî diyar kir ku gelên li herêmê di tevahiya dîrokê de ji ber nasnameyên xwe rû bi rûyê zextan mane û got, “Ev înîsiyatîf wê mezin bibe û veguhere kongreyeke neteweyî.”
Hevşaredarê Bajarê Mezin ê Mêrdînê Ahmet Turk ku wezîfeya wî hate xespkirin û qeyûm şûna wî hate tayînkirin, diyar kir ku siyaseta demokratîk xurt bûye û got, “Komara Demokratîk bi hewldana hevpar a gelan pêkan e.”
Turk destnîşan kir ku partiyên siyasî û civaka sivîl ji bo siberoja gelê Kurd divê bi hev re tevbigere.
Turk bal kişand ser geşedanên li Sûriyeyê û bi bîr xist ku Kurdan ji bo ewlehiya xwe çek rakirine û ev tişt got: “Niha tê xwestin ku Kurd çekên xwe berdin. Bi taybetî Tirkiye. Başe, li vir dê kî ewlehiyê pêk bîne? Polîs û leşkerên HTŞ’ê nînin. Li wir hêzeke HTŞ’ê nîne. Gelo dê kî ewlehiya vî gelî pêk bîne? Ji vê hîn wêdetir şûna ku HTŞ bibe cîranê Tirkiyeyê, bila Kurd bibin. Ma dê qiyamet rabe!”
Turk anî ziman ku Sûriye xeta sor a Kurdan e û got, bi Kurdan re hevpar tevbigerin.
Konferans bi panel û semînerên nûnerên ji gelên cuda, dewam dike.
