Li seranserê cîhanê ji ‘’Banga Aşitî û Civaka Demokratîk’’ a Rêber Apo re peyamên piştevaniyê tên dayîn. Herî dawiyê Fîlozofê Îngilîz ê navdar Simon Critchley, di peyama xwe ya ji bo DEM Partiyê şand de banga Rêber Apo weke ji bo tevgerên antîkapîtalîst û muxalîf pêvgaveke wisa ye ku îlhamê dide, pênase kir.
Naveroka peyama fîlozofê Îngilîz ê navdar Simon Critchley bi vî rengî ye:
‘’Banga Abdullah Ocalan a Aşitî û Civaka Demokratîk ya 27’ê Sibata 2025’an, di serdemeke ku li seranserê cîhanê melaqiya şer dihat kirin de hate kirin. Ez di wê baweriyê de me ku ev bang ji bo tevgerên antîkapîtalîst û muxalîf pêvgaveke wisa ye ku îlhamê dide. Ocalan di gel ku rêxistina ku bi xwe ava kiriye, fesix dike jî di heman demê de veguherîneke îdeolojîk jî pêşniyar dike û weke kesekî ji hêza gotinê bawer dike, ne çekan hêza civakê tercîh dike. Ez heya dawiyê piştgiriyê didim parastinên ne neteweperest ên gelê Kurd ên ku yek ji mezintirîn neteweyên bêdewlet ên li seranserê cîhanê ne. Hêvî dikim ku şert û mercên Ocalan tavilê werin sererastkirin û ji bo wî rêyên beşdarbûna siyaseta demokratîk a bi awayekî çalak werin vekirin.’’
SIMON CRITCHLEY KÎ YE?
Fîlozofê Îngilîz ê navdar Simon Critchley, di sala 1960’î de ji dayîk bûye. Simon Critchley, di qadên exlaq û siyasetê de weke kesekî navdar tê naskirin. Critchley, ji sala 2004’an ve ye li New School for Social Research a li New Yorkê dersan dide û beriya wê jî li zanîngehên weke Nijmegen, Sydney, Notre Dame, Cardozo Law School û Osloyê weke endamê hîndekariyê yê demkî dixebitî. Herwiha di navbera salên 1994-1999’an de erkê Serokatiya Komeleya Fenomenolojiya Îngilîzan bi rê ve biriye.
Critchley, di warê felsefeyê de bi xebatên xwe yên li ser exlaq, hîçparêzî, siyaset û hunerê tê naskirin û li seranserê cîhanê weke figureke entellektuel ê bandora wî li ser gelek tevgerên çepgir û muxalîf heye, tê qebûlkirin.
