6’emîn Festîvala Çand, Huner û Werzîşê ya Şehîd Bawer Agir ku ji aliyê Tevgera Ciwanên Şoreşger ê Sûriyeyê ve tê lidarxistin, li bajarê Kobanê dest pê kir. Festîval wê 3 rojan bidome.
Festîval bi dirûşma “Bi hêvî û baweriya şehîdan, aştî û civaka demokratîk, azadiya fîzîkî ya Rêber Apo mîsoger bike” li Stadyuma Şehîd Bawer Agir a li bajarê Kobanê tê li darxistin. Bi sedan şêniyên kantona Firatê, nûnerên saziyên Rêveberiya Xwerser ya herêma Bakur û Rojhilatê Sûriyeyê, partiyên siyasî, rêxistinên jinan, saziyên sivîl û gelek mêvan ji kantonên Reqa, Tebqa û Cizîrê beşdar bûn.
Stadyuma Şehîd Bawer Agir, stadyuma herî mezin ê Bakur û Rojhilatê Sûriyeyê ye, îro di roja yekemîn a festîvalê de fermî hate vekirin. Stadyum bi wêneyên Rêber Apo, wêneyên şehîdan û bi alan hat xemilandin.
Piştî vekirina stadyumê, festîval ji aliyê dayika şehîdan ve hate vekirin. Piştre hevseroka Desteya Ciwan û Werzîşê ya kantona Firatê Avaşîn Misto axivî.
Avaşîn Miston festîval diyarî hemû cangoriyên azadiyê û hemû gelên azadîxwaz û Rêber Apo kir û wiha got: “Stadyumeke bi vî rengî, bi saya têkoşîn û berxewdana şehîdên me hatiye avakirin. Em ê jî bi rihê têkoşîna wan li ber xwe didin. Em vê festîvalê diyarî hemû kesên ku dilê wan ji bo azadiyê lê dide, dikin.”
Li ser navê Tevgera Ciwanen Şoreşger a Sûriyeyê Harûn Apoyî axivî û destnîşan kir ku ew ê bi rihê ciwanan dagirkeriyê têk bibin û azadiyê bi ser bixin û got: “Ji bo ku em dagirkeriyê ji holê rakin û cenga azadiyê bi ser bixin, divê ciwanên me bi hemû hêz û vîna xwe û bi taybet bi hunera xwe li hemberî dagirkeriyê têkoşîn bikin û li ber xwe bidin. Em vê festîvala pîroz li hemû kesên azadîxwaz pîroz dikin.”
Dayika Şehîd Bawer Îslim Derwîş bixêrhatina hemû kesên hazir kir û wiha got: “Şehîd Bawer bi hemû têkoşîna xwe li dijî dijmin têkoşîn kir û her tim xwe feda dikir. Em bi hêvî ne xwedî li keda Şehîd Bawer derkevin û xwedî hêz bin ji bo ku ew karibin dijmin têk bibin.”
Endezyarê Stadyuma Şehîd Bawer Agir Xelîl Ebdî destnîşan kir ku ew bi vê roja pîroz kêfxweşin û wiha got: “Em vê stadyumê diyarî hemû şehîdên azadiyê dikin. Ev stadyuma herî mezin a li ser asta Bakur û Rojhilatê Sûriyeyê diyarî hemû ciwanan dikin. Ev stadyum ji bo ciwanan û werzîşê semboleke bi nirx e.”
Ji fermandarên Yekîneyên Parastina Jin (YPJ) Sarya Efrîn hemû şehîdên azadiyê bi bîr anî û wiha got: “Di salvegera Şehîd Bewer de, di vekirina vê stadyumê de, em careke din sozên xwe nû dikin. Beriya çend roja salvegera Komploya Navnetewî ya li dijî Rêber Apo bû, salvegera dagirkirina Girê Spî û Serêkanî bû. Dijmin her tim dixwazin hêz û vîna gelê me tune, lê gelê me hêza xwe ji şehîdên xwe digire, wê demê çi dibe bila bibe hêza gelê me ya herî xurt e. Em jî wek YPJ’ê soz didin ku em ê gelê xwe biparêzin û li hemberî dijmin têbikoşin.”
Piştî axaftinan komên hunerî yên ên pêkhateyên, Kurd, Ereb, Ermen û Suryan govendên gelêrî pêşkêş kirin.
