Endamê Komeleya Alîkarî û Piştevaniya Alimên Olî (DIAYDER) Abdullah Arikan anî ziman ku pêvajoya aştiyê bi rengekî yekalî nikare bi pêş ve biçe û destnîşan kir ku hemû alî divê ji bo aştiyê bi berpirsyarî rabin.
Alimê olî Abdullah Arikan ji ANF’ê re axivî û bi bîr xist ku li gorî Îslamiyetê kî ji bo aştiyê gavekê biavêje wê xêra herî mezin bike û got, di aştiyê de jî yekbûyîn, edalet û wekhevî divê esas be.
PERSPEKTÎFA RÊBER APO JI BO HEMÛ GELAN E
Arikan diyar kir ku divê hemû alî û bawerî ji bo aştiyê bi berpirsyariyê rabin û got, “Gelê Kurd salên dûr û dirêj e ji bo statuya xwe têdikoşe. Aştî tenê bi gotinê nabe. Di ola Îslamê de cihê vê gelekî zelal e; aştî divê li ser xwişk-biratî û edaletê ava bibe. Em piştgiriyê didin pêvajoya aştiyê. Zêdeyî 40 sal in têkoşîneke mafdar tê meşandin. Kurd neteweya herî qelebalix a li Rojhilata Navîn e û statuya wan nîne. Daxwazên gelê Kurd bi qasî şîrê dayikê helal e. Di vî şerî de berdêlên gelekî giran hatin dayin. Ev têkoşîn ne tenê ji bo gelê Kurd e, ji bo tevahiya gelên Rojhilata Navîn e. Em mînaka herî baş a vê yekê li Rojava dibînin. Perspektîfa Rêber Apo ji bo hemû gelên bindest e.”
‘DIVÊ DEWLET BI BERPIRSYARIYÊ RABE Û GAVÊ BIAVÊJE’
Arikan destnîşan kir ku Rêber Apo di nava çar dîwaran de berpirsyariya xwe ya dîrokî bi cih tîne û got, “Aştî bi rengekî yekalî nameşe. Aliyekî têkoşîna xwe ya çekdarî bi dawî kir, lê dewlet ku aliyê din e hîn jî êrîşan dike. Bi hezaran hevalên me yên siyasî girtî ne. Aştî li ser edaletê ava dibe. Ji ber vê ykeê divê dewleta Tirk bi rengekî adîl gavê biavêje. Divê gavên welê biavêje ku bersivê bide daxwazên gelê Kurd. Li Tirkiyeyê çawa ku mafên Tirkan hebe divê Kurd jî xwedî heman mafan be. Pêvajo tenê bi vî rengî dikare bi pêş ve biçe. Gelê Kurd û Rêber Apo sozên xwe yên ji bo aştiyê hemû bi cih anîn. Ji ber vê yekê serê me bilind e. Em dibêjin divê dewlet bi berpirsyariyê rabe û êdî gavê biavêje.”
