Triki peyama xwe ya li ser pêvajoyê ji Partiya Demokrasî û Wekheviyê ya Gelan (DEM PartÎ) re şand. Triki di peyamê de hewldanên ji bo çareseriya aştiyane ya pirsgirêka Kurd bi gotina “Pêvajoyeke dîrokî” pênase kir û got, “Ez fîlozofê Tûnisî Fathi Triki piştgiriyê didim pêvajoya aştiyê ya dîrokî ya ji bo civaka Kurd a li Tirkiyeyê. Kurd xwedî wî mafî ne ku tevlî jiyana siyasî, sivîl a bi rûmet û azadiyê bibe.”
FATHI TRIKI KÎ YE?
Fathi Triki sala 1947’an li bajarê Sfaxê yê Tûnisê ji dayik bû, li Fransayê perwerde dît û li Zanîngeha Sorbonneyê doktora felsefeyê qedand. Li Zanîngeha Tûnisê weke profesorê felsefeya hemdem wezîfeyê dike. Triki di heman demê de dekanê berê yê Fakulteya Zanistên Beşerî û Wêjeyê ya Zanîngeha Sfaxê ye.
Triki ku ji sala 1997’an û vir ve Serokê Kursiya Felsefeyê ya Cîhana Ereb a UNESCO ye, di karên xwe yên fikrî de giraniyê dide mijarên nasname, modernîte, xweşbînî, estatîk, şer û felsefe di nava jiyana civakî de.
Fîlozof ku pîvana “Jiyaneke bi hev re û bi rûmet” diparêze, bi helwest û biryardariya xwe ya li ser jiyaneke hevpar a aştiyane ya bi cihêrengiyê tê naskirin.
