Rêxistinên civaka sivîl ên li taxên Şêxmeqsûd û Eşrefiyê yên Helebê îro der bar rewşa her du taxan de daxuyaniyek da. Daxuyanî li xala kontrolê ya Ewarid ji hêla hevserokê Malbenda Heleb a Rewşenbîriyê Ehmed Bîrhat ve bi tevlîbûna nûnerên partiyên siyasî û rêxistinên civaka sivîl hate xwendin.
Di daxuyaniyê de hat gotin: “Peymana 10’ê Adarê ya di navbera serokê hikûmeta veguhêz Ehmed El Şeri û fermandarê Hêzên Sûriyeya Demokratîk Mezlûm Ebdî de hate îmzekirin ji 8 xalan pêk tê. Yek ji wan xalan der barê agirbestek giştî de ye. Piştî wê di 1’ê Nîsana 2025’an de peymanek ji 14 xalan der barê rewşa taxên Şêxmeqsûd û Eşrefiyê de hat îmzekirin, lê heta niha hîn bi tevahî nehatine bicîhanîn. Ev yek bandorek neyînî li ser jiyana şêniyan dike.”
Di dewama daxuyaniyê de hate diyarkirin ku “kiryarên kirêt yên li dijî sivîlan li xalên kontrolê, bi taybetî lêgerînên ne guncaw ên li hemberî jinan” hatin şermezarkirin û hate gotin, ev kiryar dê bibe sedema encamên xerab li ser yekitî û aramiya civakê. Her wiha daxwaza lêpirsînek fermî û hesabpirsîna berpirsiyaran hat kirin.
Rêxistinên civaka sivîl di daxuyaniya xwe de çend daxwaz rêz kirin: “Bicîhanîna hemû şertên peymana 1’ê Nîsana 2025’an, bidawîanîna her cûre dorpêçkirin û tacîza ewlehiyê ya li ser şêniyan da ku şênî haribin bi azadî tevbigerin, kar bikin û herin dibistanan û nxweşxaneyan, destpêkirina lêpirsînek fermî der barê kiryarên lêgerîn û tengavkirina sivîlan de û bidawîanîna gotinên nefretê li ser medyayê û medyaya dijîtal.”
