Bi boneya salvegera şehadeta nûçegihana ANHA’yê Dilîşan Îbiş merasîma bîranînê li ser gorê wê ya li Pakrewangeha Şehîd Dicle ya li bajarê Kobanê hat lidarxistin. Malbata şehîd Dilîşan û hevreyên wê yên rojnamevan bi bilindkirina wêneyên wê beşdarî merasîmê bûn.
Piştî deqeya rêzgirtinê, endama Meclisa Yekitiya Ragihandina Jin (YRJ) Dicle Ehmed axivî. Dicle şehîd Dilîşan û hemû şehîdên rêya heqîqetê bi bîr anî û wiha got, “Di salvgera 8`emîn a şehadeta şehîd Dilîşan de, em hemû şehîdên çapememiya azad; Hogir, Seed, Dilovan Gever, Nazim û Cîhan Bîlgîn bi bîr tînin. Em soz didin ku em her tim rastiyê derxînin holê. Em ê şopdarên rêya şehîdan bin û bi pênûs û kamereya xwe rastiyê û dengê şoreşa gelê xwe ji cîhanê re raghînin, heta ku em bigihêjin Sûriyeyeke nenavendî û demokratîk.”
Dicle Ehmed destnîşan kir şehîd Dilîşan xwedî kesayeke bi hêz û bû, her tim ji bo derxistina heqîqetê têkoşîn dikir û wiha got: “Şehîd Dilîşan ku ji bo derxistina heqîqetê têkoşîn dikir û rastiya dewleta Tirk û çeteyên wê ku komkujî û sûcan li dijî sivîlan teşhîr dikir.”
Dayika şehîd Dilîşan Îbiş, Semşe Mihemed Elî di merasîma bîranînê de axivî û got: “Em xêrhatina hevrêyên şehîd Dilîşan dikin. Şehîd Dilîşan bi fedakariya xwe heqîqetê ragihand û hevrêyên wê divê şopdarên rêya wê ya pîroz bin.”
Di dawiya merasîmê wêneyên şehîd Dilîşan diyarî malbatê hate kirin.
12’ê Cotmeha 2017’an, dema ku welatiyên sivîl ber bi herêmên rizgarkirî ve dihatin û bi hevkariya şervanên QSD’ê xwe ji hovîtiya çeteyên DAÎŞ’ê rizgar dikirin, nûçegihanên me Dilîşan Îbiş, Hogir Mihemed û Rizgar Denîz, ji bo rewşa van koçberan bişopînin, berê xwe dan rêya ‘Xerafî’ ya navbera Dêrazorê û Hesekê. Li vir çeteyên DAÎŞ’ê du wesayîtên bombebarkirî teqandin. Di encama teqînê de Dilîşan Îbiş û Hogir Mihemed şehîd bûn û Rizgar Denîz bi giranî birîndar bû, li nexweşxaneyên Hesekê, piştre jî li nexweşxaneyên Qamişloyê, herî dawî li Şamê tedawî bû. Lê tevî hemû hewldanên bijîşkan jî Rizgar Deniz di 18′ê Kanûna 2017’an de şehîd bibû.
