Dem 2018 bû em li hunerê digeriyan. Ya rast di jiyana her gerîlayî de, di lênûska her gerîlayekî de bi têra xwe huner heye, lê dîsa jî me xwest, hîn bêhtir peyda bikin. Di nava lêgerîneke bi vî rengî de gotin “Dengê hevalê Helo gelekî taybet e, divê hûn teqez lê guhdarî bikin”. Ya rast me berê dengê wî bihîstibû, gotibûn “Bi malbatî tevlî partiyê bûn”, her wiha xwişkeke wî jî hebû ku li gel wî tevlî nava refên têkoşînê bû, berê xwe da çiyayên Kurdistanê.
Baş e, kî bû? Li ku ji dayik bûbû, li kku mezin bûbû, kengî hatibû çiyayên Kurdistanê, çawa tevlî nava refên Tevgera Azadiyê ya Kurdistanê bûbû Helo Dersim? Rojhilatê Kurdistanê çar demsalên cografya Kurdistanê lê heye, xwedî dewlemendiyeke bi vî rengî ye. Rojhilat xwedî wê bedewiyê ye ku di binê heman ezmanî de çar demsal bi hev re ye, xwedî hemû rengan e, bi çiyayên xwe yên asê, bi deştên xwe yên mîna deryayê berxwedana çandê ya hezaran salî gihandiye vê serdemê. Bêguman ji nava vê bedewiya bêhempa de pirrengî diafire, bandorê li jiyana her mirovekî xwe dike. Ev çanda kûr hesteke xurt a berpirsyariyê dide mirovan.
NAVÊ MILÎSÊ ŞEHÎD LI XWE DIKE
Helo Dêrsim (Keyhan Saedmucîşî) li bajarê Kamyaran ê Rojhilatê Kurdistanê ji dayik bû. Ji ber ku ji malbateke welatparêz bû hîn di temenê zarokatiyê de Tevgera Azadiyê ya Kurd nas kir. Em li paşnavê wî ‘Dêrsim’ dipirsin; gelo eleqeyeke xwe bi Dêrsimê re heye, navê xwe ji wir girtiye yan na?’ Ew dibêje, şehadeta hevalekî bi navê Dêrsim ku milîstî dikir, gelekî bandor li wî kir, li ser vê yekê biryara tevlîbûnê da û navê wî li xwe kir.
DESTPÊKÊ MÎLÎS, PIŞTRE GERÎLA
Beriya tevlî bibe mîlîstiyê dike. Jiyana gerîla weke “Jinûve jidayikbûna xwe” pênase dike. Perwerdeya li vê derê wergirtî jî weke “Perwerdeya destpêkê ya dayikê” dibîne. Biryara xwe ya tevlîbûnê di sala 2013’an de dide û di sala 2014’an de tê qadên gerîla. Awaza dengê wî hesta kûr a çiyê dide mirovan, mirov li ber bayê wê hestê dixe. Bi sekna xwe ya şermok û sempatîk balê dikişîne. Mirov fêhm dike ku ev sekna wî ji ber hurmeta wî ya ji bo mirovan e.
JI BO QEYDKIRINA DENGÊ WÎ
Wê kêliyê li akademiyeke ser bi Fermandariya Akademiyên Apollo perwerdeyê dibîne. Em difikirîn ku li atmosfereke bêdeng li çîroka wî guhdarî bikin. Hingî ev gotina şehîd Koçero Urfa (Metin Arslan) hat bîra me; ‘Hûn bixwzin bi kîjan hevalî re biaxivin hûn serbest in, tenê perwerdeya li akademiyê sabote nekin’. Piştî ku ji bo qeydkirina dengê şehîd Helo me destûra pêwîst wergirt, em ji qada akademiyê hinekî dûr ketin. Me amadekariyên pêwîst kir û êdî amade bûn. Ji bo şermê ji ser xwe biavêje me demek dananî pêşiya wî, em bi sebir nêzîk bûn. Pirsên li derveyî mijara xwe me lê dikir, ji bo hinekî aram bibe. Dipirse, ‘Bila kamera nebe, tenê qeyda deng hebe?’ Piştî ku me got dibe, me kamerayên xwe rakir. Di vê kêliyê de bi kamerayeke biçûk jî bêyî ku pê bihese me dest bi qeydê kir. Li gel qeydkirina dengê gerîlayekî em dixwazin dîmenê gerîla jî qeyd bikin.
Û DEST BI STRANÊ DIKE
Bi gotina, ‘Dertdet va kulam Leyla, qemet bareme’ destpê dike, şehîd Helo Dêrsim. Cîhan wê kêliyê bi bedewiyeke hîn cuda xemilî. Tê zanîn strana ‘Leyla’ ji bo jina Kurd a yekemîn a hate darvekirin Leyla Qasim hate nivîsandin. Weke ku tê zanîn Leyla Qasim 12’ê Gulana 1974’an li gel 5 hevalên xwe ji aliyê rejîma Baasê ve hate darvekirin û heta niha jî ji aliyê jin û gelê Kurd ve weke sembola azadiyê tê dîtin.
BI KAMERAYÊ DIHESE LÊ BELÊ NASEKINE
Di dema stranê de bi kamerayê diheseke ku qeyd dike, bi rûkenî hewl dide haya me jî pê bike. Şehîd Helo Dêrsim wê stranê ewqasî bi lez distirê ku mirov fêhm nake bê çawa destpê kir û çawa qedand. Piştî ku gotina dawî dibêje, yekser radibe û hewl dide xwe ji pêşiya kamerayê bide alî. Lê cîhan bi dengê şehîd Helo Dêrsim ji bo du deqeyan jî dibe cihekî gelekî cuda…
Gerîla, dengbêj û fermandar şehîd Helo Dêrsim 9’ê Mijdara 2024’an li Herêmên Parastinê yên Medyayê şehîd bû. Xwişka wî ya mezin Viyan Helo jî 21’ê Nîsana 2024’an li Qendîlê tevlî karwanê şehîdan bûbû.
