Dewleta Tirk a dagirker ji 23’yê Nîsana 2021’an û vir ve li dijî Herêmên Metîna, Zap, Avaşîn û Başûrê Kurdistanê yên Herêmên Parastinê yên Medyayê ji bejahî û hewayî ve êrîşên dagirkerî û îlhaqê daye destpêkirin. Êrîşên artêşa Tirk a dagirker ku ev 3 sal in bê navber didome, di 16’ê Nîsanê de li herêmên cuda yên Metînayê dest bi êrîşeke nû ya berfireh kir. Artêşa Tirk a dagirker di 3’yê Tîrmehê de jî bi desteka PDK’ê ji aliyê Amediyê ve êrîşê Girê Bahar a li herêma Zapê kirin. Artêşa Tirk a dagirker bi desteka PDK’ê ev 3 sal in êrîşên dagirkerî û îlhaqê li hemberî Gerîlayên Azadiya Kurdistanê dimeşîne.
Dewleta Tirk a dagirker û hikûmeta şer a AKP-MHP’ê, piştî êrîşên xwe yên bi taybetî di 3’yê Tîrmehê de li dijî Herêmên parastinê yên Medyayê û Başûrê Kurdistanê hatin meşandin, pêkanînên mîna gund valakirin, şewitandina gund, bax û baxçeyên welatiyan, danîna nuqteyên kontrole, kontrolkirina nasnameyan û li nava gundan bargehên leşkerî avakirin li pêşiya çavê tevahiya cîhanê tê kirin. Di vê rewşê de eşkere bûye ku PDK û Barzanî, niha di van êrîşên dagirkerî û îlhaqê de li aliyê dewleta Tirk a dagirker in.
Li dijî êrîşên dagirkerî û îlhaqê, Gerîlayên Azadiya Kurdistanê bi tîmên bi tevger li ser esasê şerê tunelan û araziyan bersiv didin. Şer bi taybetî li xeta Metîna û Zapê dijwar bûye. Mîna ku tê zanîn ev êrîş nêzî 3 sal û nîv e berdewam dike û dewleta Tirk a dagirker û hikûmeta wê ya şer encam bi dest nexistiye. Tevî bêdengiya Iraqê, desteka PDK-Barzanî ya bêsînor jî, nekarîn encam bi dest bixin.
DAGIRKERÎ Û ÎLHAQ, JI FERMANDARÊ NÊZ Ê AKP’Ê DERBASÎ FERMANDARÊ ERGENEKONÊ DIBE
Di 9’ê Tebaxê de biryarnameyek bi îmzeya Serokkomarê Tirk, Serokê Giştî yê AKP’ê şefê faşîst Recep Tayyîp Erdogan ku tê de guhertina fermandariyên Bejahî, Hêzên Deryayî û Hewayî yên artêşa Tirk a dagirker cih digirin, hat weşandin. Di biryarnameyê de guhertina herî girîng û ya bal dikişîne, ew e ku li şûna Fermandarê Artêşa 2’yemîn Metîn Tokel, Levent Ergun hate tayînkirin. Fermandarê Artêşa 2’yemîn Metîn Tokel berpirsyarê operasyonên êrîşên dagirkerî û îlhaqê yên li Herêmên Parastinê yên Medyayê û Başûrê Kurdistanê ye. Levent Ergûn jî hefteya borî ji Korgeneraltiyê terfiyê, Orgeneraltiyê hate kirin. Ev guherîna ku di dema êrîşên dagirkerî û îlhaqkirinê de ji aliyê şefê faşîst Erdogan ve hat kirin, bal kişand. Di wateyekê de ev guhertin wiha tê şîrovekirin; operasyonên dervî sînor ji Metîn Tokel hat girtin û dewrî Levent Ergûn hat kirin. Li aliyê din nêzîkbûna Metîn Tokel a ji bo AKP’ê bi berfirehî dihat zanîn û gotinên wî yên pesnê siyasetmedarên AKP’yî yên li ofîsa wî ziyaret kirin di çapemeniyê de jî cih girtin.
HAT GIRTIN, PIŞTÎ NISÊBÎN HILWEŞAND DERXISTIN PÊŞ
Levent Ergûn ê ku ji bo êrîşên dagirkerî û îlhaqê bide meşandin weke fermandariya artêşê ya 2’yemîn hat wezîfedarkirin, di doza Balyozê de hatibû girtin û di dema Berxwedana Rêveberiya Xweser a li Nisêbînê, rola herî sereke di wêrankirin û şewitandina Nisêbînê de lîst. Ev kes ji aliyê raya giştî ya Kurd ve baş tê naskirin. Piştî girtinê û biryara dadgehê ya ji bo wî hat dayîn, vegeriya ser wezîfeya xwe. Çawa vegeriya ser wezîfeya xwe, yekser fermandariya êrîşên li dijî Nisêbînê kir. Karê wî ya ewil ew bû ku gelê Nisêbînê bide koçkirin û wêrankariyê bike. Li aliyê din, dema korgeneral bû, hefteyek berê bi Biryarnameya YAŞ’ê ji bo Orgeneralî hat terfîkirin. Piştî wê bi demekê jî erka pêkanîna êrîşên dagirkerî û îlhaqkirinê jê re hat dayîn û weke fermandarê 2’yemîn ê artêşê hat wezîfedarkirin. Levent Ergûn di çarçoveya Doza Balyoz de demekê li Girtîgeha Hasdal girtî ma.
FERMANDARÊN KU OPERASYON BI RÊVE DIBIRIN HATIN GUHERTIN
Di êrîşên dagirkerî û îlhaqkirinê de piraniya qedemeyên fermandariyê hatin guhertin. Hin guhertinên di biryarnameyê de wiha ne; Bi guhertina 2’yemîn fermandarê Artêşê re, li Amedê fermandarê baskê artêşê yê 7’emîn, li Amedê fermandarê Tûgayê Piyadeyên mekanize yê 16’emîn, li Geverê fermandarê Tûgaya Piyade ya 3’yemîn, li Şirnexê fermandarê Tûgaya Piyade ya 23’yemîn, li Dîlokê fermandarê Tûgayê zirxî ya 5’emîn, li Meletyeyê fermandarê Tûgaya Piyade ya 13’emîn, li Rihayê fermandarê Zirxî ya 20’emîn, li Çûkûrcayê fermandarê Tûgay yê sînor a 2’yemîn, li Hatayê fermandarê Tûgaya Piyade ya 39’emîn, li Wanê fermandarê sînor a 6’emîn, li Midyatê fermandarê Tûgayên Komando ya 14’emîn, li Robarokê ya Colemêrgê fermandarê Tûgayê Sînor yê 1’emîn, li Sêrtê fermandarê Tûgayên komando û li Meletyeyê fermandarê baregeha Anajetê hatin guhertin.
