Li Kurdistanê dema mehsera destpê kir. Ji ber ziwatiyê gelek rez hişk bûn. Gundiyan dest bi amadekariyan kirin ku bi tiriyê mayî dims û beniyan çê bikin.
Gundiyên Bagyolû yê navçeya Hezro ya Amedê, weke her sal îsal jî meha Cotmehê berê xwe dan rezên xwe. Gundî ku her salê dims, bastêk û beniyan çêdikin, îsal li ziwatiyê rast hatin. Ji ber hewa germ piraniya tiriyê wan di gulî de reş bûn, xera bûn. Lewma tiriyekî têrker bi dest nexistin. Gundiyan li nava rez 2 rojan kedeke mezin dan, lê bi fikar in ku ev rewş paşerojê hîn zêde bibe.
Murvet Yildenîz anî ziman ku karê wan li gel zehmetiyê her wiha hêja ye û destnîşan kir ku li mehsera keda jinê gelekî mezin e.
Murvet Yildiz diyar kir ku her sal li nava rezan sîtilan amade dikin, datînin ser êgir û got, ev kar ji pêşiyê wan maye û ji wan re bûye weke kevneşopiyekê. Murvet Yildiz ragihand ku bi germbûna hewayê re ew dest bi berhevkirina tirî dikin û got, “Em destpêkê tirî kom dikin û piştre dieciqînin. Ava tirî (şîre) rojekê dikelînin. Wê demê em beniyên xwe bi ta ve dikin. Ji bo dimsê, ji bo benî em şîre bi saetan dikelînin û li hev dixin. Piştî ku me dims çêkir, em benî û bastêqê çêdikin. Berê me kesme jî çêdikir, lê belê ji ber ku niha tirî kêm bûye em nikarin wê çêbikin. Em bastêqê li ser paçê paqij radixin û hişk dikin.
KED ZÊDE YE, BERHEM KÊM E
Em hemû gelekî dixebitin, ji bo karibin zivistanê rehet bikin. Em neelimîne tiştên ji derve têne kirîn. Em hez ji berhemên bi xwe têne çêkirin dikin. Lewma ewqas ked tê dayin. Em bi bastêq û beniyê ku bi xwe çêdikin zivistanê derbas dikin. Her wiha li mirovên li derdora xwe jî belav dikin. Zehmeta vî karî gelekî zêde ye. Yên piştî me wê vî karî dewam bikin. Dmea ku tiriyê me kêm be jî li şûna kirîna ji derve em şîreyê dikirin û dîsa jî bi xwe çêdikin.”
JI BER ZIWATIYÊ TIRÎ XERA BÛ
Alîhan Kûşlû ragihand ku mehsere ne weke berê ye, ziwatiyê bandor li berheman kiriye û got, “Zêdeyî nîvê tirî li guliyê xwe xera bûne. Ji berê ve em vî karî dikin. Îsal mixabin ji ber ziwatiyê û germa zêde nîvê tiriyê me xera bû. Ji ber wê me nekarî bi kar bînin. Salên dawî em gelek caran li vê rewşê rast tên. Berê dema ku em dihatin du, sê rojan em li nava rez diman, lê tehma berê nemaye. Bi guhertina avhewayê re xweza jî diguhere. Îsal tirî zêde bû, lê belê weke sebzeyên din hemû şewitî, xera bû. Em nikarin berhemdariya berê werbigirin. Sala bê wê hîn xerab be. Divê çareseriyek jê re bê peydakirin.”
