Li herêma Cizîrê di bin banê Federasyona Gaziyên Bakur û Rojhilatê Sûriyeyê de bi tevlîbûna gaziyên şer li Hesekê civîneke bîranînê hat lidarxistin.
Di civîna bi rêzgirtina ji bo şehîdan dest pê kir, axaftina destpêkê ji aliyê yek ji rêvebera Federasyona Gaziyên Bakur û Rojhilatê Sûriyeyê Şîlan Kobanê ve hat kirin.
Şîlan Kobanê bal kişand ser kesayet û têkoşîna Bêrîtan a li hember xiyanetê û got ku Bêrîtan bi berxwedana xwe ji bo tevahî jinan û şervanên azadiyê bû xeta berxwedanê.
Şîlanê diyar kir ku Bêrîtan a xwe bi fikir û ramanên Rêber Apo pêş xistibû, bi sekn, helwest û têkoşîna xwe mînak û got, “Em ê timî di rêya şehîdên xwe de bimeşin.”
Piştre jî gaziyê şer û endamê FGBRS’ê Elî Ehmed destnîşan kir ku wê weke gaziyên şer şoreşa bi berdêlên mezin ên şehîdan ava bûye, bi her awayî biparêzin û ji bo pêkanîna xeyalên şehîdan wê timî di nav têkoşînê de bin.
Civîn bi nirxandinên gaziyên şer ên têkildarî jiyan û têkoşîna şehîd Bêrîtan bi dawî bû.
ÇILAXA
Li Çilaxa jî gaziyên şer tevlî bîranîna şehîd Bêrîtan bûn. Di bîranîna bi deqeyek rêzgirtina ji bo şehîdan dest pê kir de, der barê jiyan û têkoşîna fermandar Bêrîtan de axaftin hatin kirin.
Gaziyên şer anîn ziman ku wê timî li ser xeta berxwedanê ya şehîd Bêrîtan bimeşin. Gaziyan anîn ziman ku wê ala berxwedanê ya şehîd Bêrîtan timî bilind bikin û têkoşîna azadiyê teqez bi serketinê tacîdar bikin.
