Kongra Star îro ji bo şermezarkirina tecrîda li ser Rêber Apo û daxwaza mafê hêviyê xwepêşandaneke girseyî lidar xist. Bi hezaran şêniyên ji bajarên Hesekê, Holê, Til Temir û Til Brakê, her wiha endamên rêxistinên civaka sivîl, partiyên siyasî û tevgerên jinan, tevlî xwepêşandanê bûn.
Xwepêşandanê li Çerxerêya Sînalko ya bajarê Hesekê dest pê kir û ber bi Parka Rêber a li taxa El Nasira ve çû. Beşdaran wêneyên Rêber Apo û alên rêxistinên jinan û pankartên “Jin, Jiyan, Azadî” “Mafê hêviyê dê pêk were” hildan.
Di xwepêşandanê de, beşdaran dirûşmên piştgiriya berxwedana Rêber Apo berz kirin.
Li Parka Rêber piştî deqeya rêzgirtinê, endama Koordînasyona Kongra Star Jiyan Hisên axivî û got: “Em jinên Bakur û Rojhilatê Sûriyeyê, soz didin rêberê xwe, yê ku azadî da me û rêya têkoşîn û wekheviyê li pêşiya me vekir ku em ê têkoşîna xwe heta azadiya wî bidomînin. Em ê felsefeya wî ya azadî û civaka demokratîk bikin rêbazek jiyanê ji bo xwe, wê di jiyana xwe de bicîh bînin.”
Berdevka Kongra Star a Holê Bedriya Hisên jî got: “Rêber Abdullah Ocalan her gav bûye bersiva her qonaxê. Piştî ku pergala kapîtalîst a cîhanî ket krîzeke mezin û îsbat bû ku nikare pirsgirêkên heyî çareser bike, rêber bangek ji bo aştî û civaka demokratîk da destpêkirin. Dewleta Tirkiyê ji bo ku xwe ji aloziyê rizgar bike, berê xwe da Îmraliyê.”
Xwepêşandan bi dirûşmên ku daxwaza azadiya fîzîkî ya Rêber Apo dikin û dirûşmên wekî “Bê Serok jiyan nabe” bi dawî bû.
