13. Konferansa Komîteya Malbatên Şehîdan a Wargeha Şehîd Rûstem Cûdî (Mexmûr) li salona konferansê bi şîara “Li şehîdan xwedî derketin bi avakirina civaka demokratîk û komînal pêkan e” destpê kir. Konferans wê du rojan berdewam bike.
Salona konferansê bi wêneyê Rêbert Apo, şehîdan, ala KCK û KJK, her wiha bi pankartên ku bi nivîsa ‘Şehîd şoreşa herî kûr a dîrokê ne, Şehîd têgihiştina berxwedana gel e, Em ê xwe bi rêxsitinkirinê bigihînin serkeftinê, Şehîd Vejîna jiyanê ne û Yê ku ji bo azadiya civakê canê xwe bide, wê di wijdana civakê de bijî’ hatibû xemilandin. Konferans ji bo tevahî şehîdên Tevgera Azadiya Kurdistanê bi deqeyek rêzgirtin destpê kir. Piştî rêzgirtinê, axaftina vekirinê ji aliyê Hevserokê Dîwana Meclîsa Gel a wargehê Elî Bilehî ve hat kirin.
Elî Bilehî di destpêka axaftina xwe de 13. Konferansa Komîteya Malbatên Şehîdan li Rêber Apo, malbatên şehîdan û tevahî çêkera amade pîroz kir û wiha got: “Bê guman di serdemek bi vî rengî dîrokî de lidarxistina konferansek pir bi watedar e. Rêber Apo bi Manîfestoya Aştî û Civaka Demokratîk pêngavek nû da destpêkirin. Hem di aliyê stratejîk de, hem di aliyê siyasî û hem jî di aliyê civakî de guhertin û veguhertinên ku pêwîst dike hatin avêtin. Li Wargeha Şehîd Rustem Cûdî jî li serdemek a Aştî û Civaka Demokratîk lidar xistina Konferansa Komîteya Malbatên Şehîdan, piştgirî dayîna pêngava Rêber Apo ye. Bêguman ji bo em bi pêvajoyê re bibin yek, erk û berpirsyartiya herî mezin dikeve li ser milê malbatên şehîdan. Ji bo em bikaribin destê Rêbertî xurt bikin û projeyên Rêbertî jiyanî bikin, ya herî girîng xwe rêxistinkirin û berpirsyartiyên xwe pêkanîn e. Eger Rêber Apo heyîna mirovan bi rêxistinkirinê dide pênasekirin, ya ji me tê xwestin jî xwe rêxistinkirin e. Ji bo xwe rêxistinkirinê, li Wargeha Şehîd Rustem Cûdî ji bo em bikaribin modernîteya demokratîk hîn zêdetir xurtir û jiyanî bikin, erk û berpirsyartiya me malbatên şehîdan in. Ji ber ku xwe rêxsitinkirina li wargehê yê ku herî rolê sereke bileyîze û vêya jiyanî bike, dîsa malbatên şehîdan in.”
Piştî axaftina vekirinê sînevîzyona ku li ser têkoşîna Şehîd Rojger û Şehîd Asya hatibû amadekirin, hat nîşandan. Her wiha piştî sînevîzyonê perspektîfa Rêber Apo hat xwendin û piştre rapora kar û xebatan a du salan a Komîteya Malbatên Şehîdan hat xwendin. Bi wê ve girêdayî mêvanên ku ji Şengalê hatibûn peyamên girîng pêşkêşî Konferansê kirin û peyamên ku ji her çar aliyên Kurdistanê ji bo Konferansê jî hatibûn, hat xwendin.
Konferans wê bi nirxandinên rewşa siyasî, kar û xebatên du salan ê Komîteya Malbatên Şehîdan bidome.
