Ev berxwedana 134 rojan bi şahidiya dîroka bi hezaran salan hate nivîsandin. Şoreşa ku di pêşengiya jinan de dest pê kir, veguherî berxwedana gel li ser xeta “hebûn û tunebûnê.” Çîroka Kobanê êdî ne tenê çîroka bajarekî ye, di heman demê de çîroka azadiyê ye jî.
DENGÊ BERXWEDANÊ
Li aliyekî dengê guleyan bilind dibû, li aliyê din jî qîrîna jinên azad: “Em ê bi ser bikevin! Kobanê nakeve!” Di dîrokê de weke Kobanê efsaneyên ji xwedawendan ku li hemberî terorê li ber xwe didin û agirê azadiyê pêdixin û li dora agir dîlana azadiyê digerîn in tune bû. Ev berxwedan veguherî hêviyê û di dilê desthilatdaran de bû kul.
KURDISTAN BÛ YEK DIL
Bi hezaran ciwan ji Bakur, Başûr û Rojhilatê Kurdistanê bi banga seferberiyê ya Rêber Apo ber bi Kobanê ve herikîn. Kurdistan li Kobanê bû yek laş û yek dil. Gel ji her deverê di biryardariya xwe ya ji bo serketinê de bûn yek. Şervanên berxwedanê yên bi çekên ferdî li dijî tank û topan şer dikirin, careke din nîşan dan ku îrade ji çekan xurttir e.
ROJA KOBANÊ YA CÎHANÎ
Piştî êrîşa DAÎŞ’ê ya 15’ê Îlonê, her kes biçûk û mezin, beşdarî parastina Kobanê bûn. Ev berxwedana şervanên fedaî ya li Kobanê bala tevahî gelên cîhanê kişand. Ev têkoşîna ku di dîrokê de cih girt, wekî berxwedana sedsalê hate pênasekirin. Ev serketina ku bi derfetên sînorkirî hat bidestxistin, hêza herî mezin a terorîst têk bir.
BERXWEDANEKE KU LI CÎHANÊ DENG VEDA
Berxwedana Kobanê ya dîrokî di encama berdêlên mezin de gihişt serketinê. Bi hezaran şehîd li benda rizgarkirina Kobanê şehîd bûn. Şervanên YPG û YPJ’ê ne tenê Kobanê, tevahiya cîhanê ji tariya DAÎŞ’ê rizgar kirin. Planên dagirkeriyê, ku di bin navê “Îslamê” de bi xeyalên Osmaniyek nû hatin kirin, di encama berxwedana li vir de hatin têkbirin.
Berxwedana Kobanê ya li dijî DAÎŞ’ê qonaxeke dîrokî li Sûriyeyê nîşan da. Gelek tevgerên civakî ji Asya, Ewropa û Emerîkayê banga hevgirtinê kirin. 1’ê Mijdarê wekî Roja Hevgirtina Cîhanî bi Kobanê re hate ragihandin. Ji wê demê ve, 1’ê Mijdarê weke berxwedana Kobanê tê bîranîn. Ev berxwedan ku bi pêşengiya jinan hat meşandin, li çaraliyê cîhanê bûye sembola têkoşîna azadiyê.
TÊKOŞÎNEKE KU SÎNORAN DERBAS KIR
Bi hezaran kes ji Bakurê Kurdistanê ji bo piştgiriya Kobanê herikîn ser sînor. Her yek ji wan bûn pîzotek ji agir û li hemberî paşverûtiyê û li hemberî îslama radîkal rabûn. Di serdema ku DAÎŞ’ê deverên berfireh li Iraq û Sûriyeyê dagir kir de, Kobanê yekem bajarê ku wê tarîtiyê şikand bû. Bi berxwedana YPG û YPJ’ê re, Kobanê ji bo cîhanê bû sembola azadiyê.
KOBANÊ BI SER KET
Çavên hovan her li bajarê Kurdan Kobanê bû. Ev bajar cihê ku Rêberê Gelê Kurd Abdullah Ocalan cara yekem derbasî Sûriyeyê bû û çirûska Şoreşa 19’ê Tîrmehê lê pêket. Ji bo vê yekê di dilê neyaran de bibû kul. Îro Kobanê sembola hêviyê ye.
Bajarê Kobanê ku di 26’ê Çileya 2015’an de ji terorê rizgar bû rûpîvanek ji bajêr weke muzexaneya şer hate diyar kirin. Li vir her dîwarek bîranîna şehîdekî dihewîne û her goşe nîşana berxwedanê hildigire. Kobanê bi ser ket; ev serketin ne wekî serketinek ji bo bajarek, wekî serketinek ji bo gel û baweriyekê di dîrokê de hat tomarkirin.
