Ji bo şervana YPJ’ê Fadîme Elkan (Bêrîtan Elbak) a ku di 6’ê Adara 2017’an de li Minbicê ya herêma Bakur û Rojhilatê Sûriyeyê şehîd bibû, li taxa Karşiyaka ya navçeya Rêya Armûşê ya Wanê, teziye hate danîn.
Teziye bi pêşengiya MEBYA-DER’ê bi rengekî girseyî hate ziyaretkirin. Girse bi berzkirina dirûşmeyên “Şehîd Namirin” û “Bijî Serok Apo” ber cihê teziyeyê ve meşiyan. Malbata şervana YPJ’ê li ber deriyê teziyê girse pêşwazî kirin.
Hevseroka MEBYA-DER’ê Hanim Kaya, bal kişand ser têkoşîna 52 salan a PKK’ê û got, “Mîna ku tê zanîn em di pêvajoyeke aştiyê de ne. PKK’ê 52 sal ji bo vê pêvajoyê têkoşîn meşand. Divê her kes zanibe Kurd hene û li her deverê ne. Têkoşîna Birêz Ocalan ê di bin tecrîdê de ji bo azadiya hemû Kurdan e.”
Hevseroka DEM Partiyê ya Wanê Gulşen Kurt, jî bal kişand ser têkoşîna ji bo yekîtîyê li çar parçeyên Kurdistanê û diyar kir ku divê gelê Kurd nirxên xwe biparêze.
Malbata şervana YPJ’ê got, “Bêrîtan berî ku biçe malbateke wê hebû, lê niha welatek wê heye.”
