Meclisa Jinan a Partiya Wekhevî û Demokrasiya Gelan (DEM Partî) serdana karkerên Smart Solar kir ku 26 roj in li navçeya Gebze ya Kocaeli di berxwedanê de ne. Piştî serdanê, li Dilovasiyê li ber deriyê kargeha Ravive Kozmetîkê, ku di şewata derketî de 6 kes, 3 jê zarok, jiyana xwe ji dest dabûn, daxuyaniya çapemeniyê hate dayîn. Berdevka Meclisa Jinan a DEM Partiyê Halîde Turkoglu, Parlamentera Stenbolê Kezban Konukçu û gelek jin beşdarî daxuyaniyê bûn.
‘JINÊN KEDKAR DI TÊKOŞÎNÊ DE PÊŞENG IN’
Bi dirûşmên “Jinên kedkar di têkoşînê de pêşeng in” ber bi cihê grevê ve meşiyan. Halîde Turkoglu li vir axivî û got ku krîza aborî ya li welêt herî zêde bandorê li karkeran dike.
Halîde Turkoglu got, “Me karkerên vê krîzê çênekir. Dixwazin mafê me yê herî bingehîn, mafê sendîkayî, ji destê me bigirin. Em hildiberînin, em fabrîkayan mezin dikin. Di vê rewşê de, divê em mafê xwe yê ku bi awayekî mirovane, bi rûmet û wekhevî heqê me ye bistînin. Ev têkoşîn wê ji bo jinên karker û kedkar ên li Tirkiyeyê destkeftiyan peyda bike.”
Parlamentera Stenbolê ya DEM Partiyê Kezban Konukçu jî diyar kir ku berxwedan têkoşîna hemû jinên kedkar e û got, “Dema hûn bi ser bikevin, kedkar hemû bi hev re wê bi ser bikevin. Em ê bi hev re welatekî ku em ê bi mirovane bijîn ava bikin.”
Jinên karker ên di berxwedanê de jî anîn ziman ku greva 27 roj in didome, yekîtiya jinan xurt kiriye. Karkeran diyar kirin ku ew piştgirî didin hevalên xwe yên ku ji ber xebatên rêxistinbûnê ji kar hatine derxistin û gotin ku ew şertên kar ên li gorî rûmeta mirovî û heqê keda xwe dixwazin, lê patron bersivê nade ti daxwazên wan.
