Hêzên HTŞ’ê û rêxistinên selefî yên girêdayî Hikûmeta Demkî ya Sûriyeyê, êrîşên xwe yên li ser nifûsa Elewî didomînin. Tê diyarkirin ku di êrîşa mezin a duyemîn a sala 2025’an de, bi sedan Elewî hatin qetilkirin.
Serokê Cemxaneya Pîr Sultan Abdal a Sultangazî ya Komeleyên Çandê ya Elewî Zeynel Odabaş, Serokê Federasyona Komeleyên Elewî Zeynel Abîdîn Koç û Hevberdevkê HDK’ê Alî Kenanoglu têkildarî êrîşên li ser Elewiyên li Sûriyeyê, ji ANF’ê re axivîn.
‘HTŞ KUJERÊ MIROVAHIYÊ YE’
Zeynel Abîdîn Koç diyar kir ku HTŞ kujerê mirovahiyê û xwezayê ye û got, HTŞ’ê li her derê komkujiyek mezin pêk anî. HTŞ’ê got, “Li vê erdnîgariyê hem li başûr, hem li rojhilat çêkerên cuda hene. Li rojhilat QSD, li jêrê Durzî hene. Ev şer îşaret dide me ku wê siberoja Sûriyeyê çawa be.
Em dikarin bêjin ku wê rojên xirab li Sûriyeyê biqewimin. Tê dîtin ku li wir dê şerê navxweyî bi dawî nebe û erdnîgariya Rojhilata Navîn car din veguhere qadeke şer. Weke Elewî em dizanin ku Tirkiye li wir xwedî hêzeke cidî ye. Em daxwaz dikin ku welatê me vê hêza xwe bi kar bîne, sînorên Elewiyên aştîxwaz biparêze û dawî li van pevçûnan bîne.”
‘PEYMANA 10’Ê ADARÊ JI BO ELEWIYAN DESTKEFTÎ YE’
Koç bal kişand ser girîngiya Peymana 10’ê Adarê ya navbera QSD û rêveberiya Şamê û diyar kir ku peyman ji bo Elewiyan deskeftiyek girîng e. Koç destnîşan kir ku HTŞ divê li gorî peymanê tevbigere û ev tişt anî ziman: “Tirkiye û Sûriye ji hevdû cûda nînin. Pêvajoya aştî û demokratîkbûnê wê bandorê li Sûriyeyê jî bike, hetta wê li Iraq û Îranê jî bike. Ji ber ku modela li Tirkiyeyê çi be, wê li Sûriyeyê jî heman be.”
‘BILA HER KES DESTÊ XWE DEYNE SER WIJDANA XWE’
Serokê Cemxaneya Pîr Sultan Abdal a Sultangazî ya Komeleyên Çandê ya Elewî Zeynel Odabaş jî diyar kir ku HTŞ rêxistineke terorîst a navneteweyî ye û ev tişt got, “Evane artêşeke kujeran e. Li Sûriyeyê berdêla şer; talan û komkujiya li dijî Elewî, Durzî û her kesê ku ji ol cuda difikire ye. Sedemên vê yên esas ew e ku Tirkiye, DYE û Îsraîl li dijî sûcên mirovahiyê bêdeng dimînin. Her kesê ku dibêje ‘ez mirov im’ divê destê xwe deyne ser wijdana xwe. Yên li hemberî komkujiya li wir bêdeng bimînin, hevkarên wê komkujiyê ne.”
Odabaş destnîşan kir ku QSD divê xwedî li gelên mazlûm ên li Sûriyeyê derkeve û bal kişand ser girîngiya bicihanîna Peymana 10’ê Adarê.
‘ELEWIYAN ŞAŞTIYEKE DÎROKÎ KIR’
Hevberdevkê HDK’ê Alî Kenanoglû diyar kir ku li Sûriyeyê Elewiyan şaştiyeke dîrokî kir, divê mekanîzmaya xwe ya parastinê ava kiriban û got, “Sala 2012’an dema Sûriye tevilhev bû, hemû koman tedbîrên xwe girtin. Duziyan çek rakirin, li bakur jî di bin sîwana QSD’ê de çek rakirin û mekanîzmayên xwe yên parastinê ava kirin.
Koma mezin a sêyem Elewiyan jî şaştiyeke cidî kir û baweriya xwe bi Esad anî. Fikirîn ku Esad dê ji bo wan bibe ewlehiya jiyanê. Lê belê dema ku Esad di şevekê de çû, Elewî li holê man û pêvajoya komkujiyê bi vî rengî destpê kir.”
‘QSD LI HEMBERÎ KOMKUJIYAN RABÛ’
Kenanoglu, diyar kir ku raya giştî ya Ewropa û cîhanê li hember komkujiyên li dijî Elewiyan bêdeng maye û got, yek ji wan sedeman ew e ku Elewiyan weke ‘alîgirê Esad’ dibînin. Kenanoglu got, “Li Tirkiyeyê jî propagandaya li dijî Elewiyan wekî ‘bermahiyên rejîmê’ hedef nîşan dide. Mixabin ev têgihiştin bûye sedema ku li hemberî komkujiya sivîlên bêguneh bêdengî çêbibe.”
Kenanoglu, anî ziman ku QSD nikare bi awayekî fîzîkî mudaxeleyî herêmê bike ji ber ku hêzên ku ji hêla Tirkiyeyê ve têne kontrol kirin li herêmê asteng in. Kenanoglu, da zanîn ku QSD gelek caran li ber komkujiyan rabûye û got, “HTŞ ji ber ku baweriya Elewiyan qebûl nake, êrîşên xwe bi motîvasyoneke olî pêk tîne. Helwesta Tirkiyeyê, komkujiyên Mereş û Çorûmê tîne bîra mirov û xetereyên bi vî rengî hîn jî berdewam dikin.”
‘PEYMANA 10’Ê ADARÊ JI BO ELEWIYAN DESTKETIYE’
Kenanoglu, diyar kir ku Peymana 10’ê Adarê ji bo Elewiyan destketiyek girîng e û destnîşan kir ku yê li gorî peymanê tevnagere HTŞ e. Kenanoglu, anî ziman ku HTŞ’ê roja piştî lihevkirinê şerîet ragihand û “Dewletek Ereb” ava kir û got, “Bi vî rengî lihevkirinê bi awayekî fîîlî bêbandor kir. Pêkanîna peymanê hem ji bo rawestandina komkujiyan û hem jî ji bo misogerkirina tevlîbûna Elewiyan di hikûmetê de girîng e. Wekî Elewiyek, ez piştgiriyê didim vê lihevkirinê.”
