Sekreterê Giştî yê Neteweyên Yekbûyî, serokkomarê berê yê Iraqê Dr. Berhem Salih ji bo postê serokê Komîseriya Bilind a Kar û Barên Koçberan a Neteweyên Yekbûyî (UNHCR) hilbijart.
Li gorî agahiyan, di nava 20 kesayetên cîhanê de Dr. Berhem Salih postê serokatiya UNHCR’ê wergirtiye û dê di nava çend rojên bê de dest bi kar bike.
Ev post piştî Sekreteriya Giştî yê NY’ê postê duyem yê herî mezine. Beriya niha ev post ji aliyê Sekreterê Giştî yê niha yê NY Antonio Guterres ve jî hatibû rêvebirin.
Piştî 75 salan cara yekeme ev post ji bo kesayetekî Rojhilata Navîn tê dayîn ku Dr. Berhem Salih wek kesayetekî siyasî yê Kurd ji bo vê postê hat tayînkirin.
Dr. Berhem Salih kî ye?
Berhem Ehmed Salih di sala 1960’an de li bajarê Silêmaniyê di nav malbatek rewşenbîr û Kurdperwerde hatiye dinê. Dayîk û bavê wî kesayetên diyar ên bajarê Silêmaniyê bûn. Di qonaxa dibistana amadeyî de dema di ezmûnê de bû Dr. Berhem Salih ji aliyê rejîma Bees’ê ve hate binçavkirin û xistin girtîgehê.
Di sala 1983’an de ji Zanîngeha Cardiff a Brîtanyayê, Bawernameya Lîsansê ya Endezyariya Mîmarî ya Înşaatê wergirtiye. Her wiha xwediyê di sala 1987’an de li Zanîngeha Lîverpool a Brîtanyayê bawernameya doktorayê di warê Îstatîstîk û Pratîka Komputerê de di Endezyariya Giştî de wergirtiye.
Dr. Berhem Salih di sala 1976’an de beşdarî Yekîtiya Nîştîmaniya Kurdistanê (YNK) dibe û di nav partiyê de gelek post digire. Yek ji wan postê cîgirê sekreterê giştî yê YNK û serokatiya du kabîneyên hikûmeta Herêma Kurdistanê bû.
Her wiha di sala 2018’an de bû Serokkomarê Iraqê û çar salan dewam kir.
