Endamê Hêzên Ewlekariya Hundirîn Elwan El Nasir ê ku 16’ê Kanûnê (2025) di encama qezaya trafîkê de li ser rêka Qamişlo- Tirbespiyê şehîd bû, îro bi merasîmekê ji aliyê dehan şêniyên bajarê Tirbespiyê yê kantona Qamişloyê ve li Pakrewangeha Şehîd Dilşêr a gundê Dugirê hat oxirkirin.
Di merasîma cenaze de endamên Hêzên Ewlekariya Hundirîn, nûnerên Rêveberiya Xweser, saziyên civaka sivîl û şêniyên bajêr beşdar bûn.
Merasîm bi deqeyek rêzgirtin dest pê kir, piştre bi navê Meclisa Malbatên Şehîdan Çekdar Tirbespiyê axivî. Çekdar Tirbespiyê got, şehîd Elwan mînaka xwişk û biratiya gelan e û got: “Dijmin çiqas hewl dan tevliheviyê di navbera Kurd, Ereb û Suryanan de derxîne, lê şehîdên mîna Elwan pêşî li van hewldanan girtin.”
Endamê Daîreya Têkiliyên Derve ya Rêveberiya Xweseriya Demokratîk Hikmet El Hebîb axivî û got: “Li vî cihî pîroz em ji her kesî re dibêjin ku li Bakur û Rojhilatê Sûriyeyê xwedî projeyek e. Ev proje ya neteweya demokratîk e ku mafên tevahî Sûriyeyan diparêze. Li hemberî pêkhateyan şerê nefretê tê kirin. Divê em ji vê yekê re baldar bin. Di navbera Kurd, Ereb û Suryan de hevgirtineke dîrokî heye. Di eniyekê de li hemberî çeteyan şer kirin û herêmên xwe parastin.”
Hebîb anî ziman ku pêkhateyên herêmê Sûriyeyeke nenavendî dixwazin da ku karibin bi çanda xwe bijîn.
Bi navê Kongreya Îslama Demokratîk Silêman Derwîş axivî û destnîşan kir ku şehîd Elwan di nav civakê de dihate hezkirin û cihê mirovên wiha buhişt e.
Ji rêveberên Hêzên Ewlekariya Hundirîn ên kantona Cizîrê Meen Asî jî diyar kir ku Hêzên Ewlekariya Hundirîn ji destpêka şoreşê ve bi dehan şehîd di rêya parastina herêmê de dan û ev li gotinên xwe zêde kirin: “Em li ser şopa hevreyên xwe ne. Li dijî gelê me şerekî teybat tê meşandin, dixwazin aramiya ku di nav gel de têk bibin. Lê em ê heta dawî gelê xwe biparêzin.”
Piştî axaftinan nasnameya şehîd hat xwendin û radestî malbatê hat kirin.
Cenazeyê şehîd bi dirûşman spart axê.
