Şervanê QSD’ê Elî (Hisên Elî El Hisên) ku 17’ê Kanûnê li Tebqayê dema erka xwe bi cih dianî şehîd bûbû, li pakrewangeha bajarê Tebqayê hat veşartin. Bi sedan şêniyên kantona Tebqayê û koçberên Efrîn-Şehbayê, nûnerên Rêveberiya Xweser, saziyên civaka sivîl, tevgerên siyasî û hêzên leşkerî û ewlehiyê beşdarî merasîma cenaze bûn.
Merasîm bi deqeyek rêzgirtin destpê kir. Piştre şervanên QSD’ê toraneke leşkerî lidar xist.
Di merasîmê de ji fermandarên Meclisa Leşkerî ya Tebqayê Îmad El Xal axivî û got: “Şehîd çavkaniyê serfirazî û rûmetê ne. Xwîna şehîdan ne rûndikên xemgîniyê ye, lê belê peymana jiyanê ye ku welat bi berdêlan tê parastin.”
El Xal anî ziman ku xwedîdeketina li şehîdan bi şopandina rêya wan, hevgirtin û dûrketina ji nakokiyan, her wiha bi xebata hevbeş a ji bo avakirina aştî û edaletê dibe.
Endama Meclisa Kombûna Jinan a Zenûbiya ya Kantona Tebqayê Xisûn Hemşo jî destnîşan kir ku şehîdan bedena xwe kirin pira ber bi ewlehî û aramiyê ve û got: “Şehadet jiyaneke nemir e. Xwîna şehîd Hisên Elî El Hisên wê meşaleya têkoşînê û avakirina civakeke azad û wekhev bimîne ta avakirina Sûriyeyeke pirrengî û nenavendî bê avakirin.”
Di dewama merasîmê de endamê Meclisa Olî ya Kantona Tebqayê Şêx Ebdulqadir El Xelîl bi navê Kongreya Îslama Demokratîk axivî û bal kişand ser mekaneta şehîdan û rola wan di avakirina welat û parastina gelan de.
Di dawiyê de nasnameya şehîd Elî hat xwendin û pêşkêşî malbata wî hat kirin. Cenazeyê şehîd Elî bi tilîliyên dayikan û dirûşmên “Bi can, bi xwîn em bi te re ne şehîd” spartin axê.
