Zextên dewleta Îranê yên li ser Kurdan dewam dikin, li gorî Rêxistina Tora Mafên Mirovan a Kurdistanê, li bajarê Urmiye yê Rojhilatê Kurdistanê, hêzên Îstixbarata Îranê avêtine ser binemala Rustemî û 3 endamên malbatê binçav kirine.
Tê gotin ku di encama serdegirtina malê de, Sofî Rustemî bi hevjîna xwe ya bi navê Zeyneb Yusuf Pur û keça xwe ya bi navê Şîlan Rustemî re hatine binçavkirin.
Hate gotin ku her 3 kes jî bêyî biryara dadwer, bi êşkenceyê hatine binçavkirin. Hate ragihandin ku heya niha jî rê nedane parêzer û malbat biçin serdana binçavkiriyan û ti agahî ji wan nayê girtin.
Rêxistinên mafên mirovan diyar kirin ku di serî de Urmiye li seranserî Rojhilatê Kurdistanê di demên dawî de zext û binçavkirin zêde bûne û bang li dewleta Îranê hate kirin ku dawî li kiryarên xwe yên kêfî bîne.
