Kongra Star bi beşdariya jinên koçber ên ji Efrîn-Şehbayê û endamên rêxistinên jinan li kampa Huriye ya bajarê Tebqayê daxuyanî da. Jinan pankartên “Na ji qetilkirina jinan re” vekirin û wêneyên jina ciwan Şêrîn Oso ya ku li Efrînê hatiye qetilkirin, hildan.
Endama meclisa Kongra Star a Efrîn-Şehbayê Hêvîn Ebdurehman bi zimanê kurdî û endama Meclisa Koçberên Kantona Efrîn-Şehbayê yên li Tebqayê Leylan Nîdal bi zimanê erebî daxuyanî xwend.
Di daxuyaniyê de hate qetilkirina Şêrîn Oso bi tundî hat şermezarkirin û hate diyarkirin ku di çarçoveya hişmendiya baviksalar a kujer de tundî û kuştina jinan zêdetir bûne. Hate destnîşankirin ku di nava bêdengiya civakî, qanûnî û navneteweyî de sûcên li dijî jinan zêdetir bûne.
Di dewama daxuyaniyê de hate gotin, qetilkirina Şêrînê encama salên dirêj ên êşkence û zulmê ye ku bi sûcekî hovane û di mercên bi guman û bi xwîneke sar de hat qetilkirin. Her wiha hate aşkerakirin ku hewl hate dayîn ku rastiya vî sûcî veşêrin û wekî xwekuştin nîşan bidin da ku hesab nayê pirsîn, an jî bi navê “Şerefê” li pêşberî civakê û raya giştî bidin xuyakirin.
Di dewama daxuyaniyê de hate gotin, hevser û malbat berpirsên vî sûcî ne ku tevahî nirxên mirovî, olî û civakî derbas kiriye.
Di dawiya daxuyaniyê de bang li aliyên têkildar hat kirin ku hesab ji kujer bipirsin. Her wiha bang li tevahî jinan kirin ku li hemberî tundiya sîstematîk a li hemberî jinên li tevahî Sûriyeyê dengê xwe bikin yek.
Daxuyanî bi berzkirina dirûşmên “Na ji qetilkirina jinan re”, “Na ji tundiya li dijî jinan re” û “Jin, Jiyan, Azadî” bi dawî bû.
