Saziyên civaka sivîl û Kongra Star ên li bajarên Herêma Bakur û Rojhilatê Sûriyeyê êrîşên komên girêdayî Wezareta Parastinê ya hikûmeta demkî ya Sûriyeyê li ser taxên Şêxmeqsûd û Eşrefiyê yên Helebê bi tundî şermezar kirin.
ÇILAXA
Kongra Star a bajarê Çilaxa yê kantona Cizîrê têkildarî êrişên li ser Şêxmesûd û Eşrefiyê daxuyaniyek da. Endama kongreyê Tesnîm Mihemed daxuyaniyê li pêş navenda kongreyê xwend. Di daxuyaniyê de hat diyarkirin li gel dorpêça li ser her du taxan êrişên li ser li her du taxên Şêxmeqsûd û Eşrefiyê hatin kirin. Hat diyarkirin ku ev rageşiya ji aliyê hikumeta veguhêz ve dikeve çarçoveya qelsbûna ewlehiya her du taxan û têkbirina aramiyê.
Daxuyanî bi silavkirina berxwedana her du taxan bi dawî bû.
AMÛDÊ
Xelkê Amûdê jî li pêş dibistana El Meerî daxuyaniyek da. Daxuyanî ji hêla hevseroka Rêveberiya Dibistanan Henan Xalid û endamê Meclisa Bajarê Amûdê Ebdurehman Şehadê ve bi amadebûna koçberên Efrîn û Şehbayê û endamên saziyên civaka Sivîl û Hêzên Ewlekariya Hundirîn hat xwendin.
Di daxuyaniyê de êrîşên komên hikumeta veguhêz ên li ser Şêxmeqsûd û Eşrefiyê hatin şermezarkirin û hat gotin ku binpêkirina eşkere li dijî şêniyên her du taxan e û ev êrîş di çarçoveya berdewama siyasetên nijadperestiyê û derxistina fitneyan de pêk hatin. Di daxuyaniyê de bang li gelê Sûriyeyê bi hemû taîfeyên wê hat kirin ku li hember hewlên derxistina fitneyan yekgirtî bin.
Daxuyanî bi silavkirina berxwedanê û şermezarkirina êrîşan bi dawî bû.
TIL HEMÎS
Xelkê Til Hemîsê, nûnerên saziyên sivîl û partiyên siyasî bi daxuyaniyekê li çerxerêya Dozgeriyê êrîşên li ser taxên Helebê şermezar kirin. Endamê Meclisa Bajarê Til Hemîsê Salih El Xelef daxuyanî xwend. Di daxuyaniyê de êriş hatin şeremzarkirin û hat gotin ku ev êriş ne bûyereke leşkerî ya derbasdar e, lê peyameke xeternak e ku piştî serdana wezîrê Parastinê yê Tirkiyeyê ji Şamê re pêk hat. Armanca wan ew bû ku peymana 10ˊê Adarê têk bibin û proseya siyasî ya cidî xerab bikin.
Di dawiyê de xelkê Til Hemîsê piştgirî da şêniyên her du taxan û hêzên leşkerî.
EYN ÎSA
Meclisa Bajarê Eyn Îsayê daxuyaniyek da. Endama rêveber a Komîteya Jinan a Meclisa Bajarê Eyn îsayê Zeyneb Xelîl daxuyanî xwend. Di daxuyaniyê de hat diyarkirin ku pêwîstî bi rawestandina tevahî şêweyên êrişan heye, rêya yekane ya parastina Sûriyeyiyan ji wêraniya zêde yekitiya neteweyî ye. Aştiya rastîn ne bi gotinan e, lê bi edalet û naskirina mafan û rêzgirtina rûmeta mirovan e.
KOBANÊ
Rêveberiya Xweser a kantona Firatê daxuyaniyek da. Şêwirmendê Qanûnî yê Rêveberiya Xweser a kantonê parêzer Mistefa Muslim bi amadebûna endamên Înîsiyatîfa Gel a Azadiya Rêber Apo, nûnerên ji saziyên sivîl, daxuyanî li navenda rêveberiyê ya kobanê xwend.
Yekitiya Parêzeran a kantona Firatê jî li navenda xwe ya Kobanê bi amadebûna yekitiyên Tevgera Civaka Demokratîk (TEV-DEM) û parêzeran û endamên Meclisa Edaleta Civakî ya kantonê daxuyaniyek da, ji hêla parêzer Şahîn Elî ve hat xwend. Di daxuyaniyan de êrişên li ser her du taxan hatin şermezarkirin û hat gotin ku ev êrîş hemwextî serdana şandeya Tirkiyeyê ji Şamê re pêk hatin. Hikûmeta demkî berpirsê tevahî êrişan e.
Di dawiyê de berxwedana Şêxmeqsûd û Eşrefiyê hat silavkirin.
BEYRÛT
Kurdistaniyên li Lubnanê bi daxuyaniyekê metirsiyên xwe ji bo êrîşên li ser Şêxmeqsûd û Eşrefiyê anîn ziman, hikûmeta demkî berpirsê êrîşan dît û bang hatin kirin ku divê dorpêç tavilê rabe, li gorî peymanên hatine îmzekirin tev bigerin û sûcdaran werin cezakirin.
Daxuyanî bi silavkirina berxwedanê bi dawî bû.
