Cenazeyê Şervana YPJ’ê Bêrîtan Fûad (Sarya Koabey) ya ku 20’ê kanûnê (2025) di encama nexweşiyê de şehîd bûbû, bi merasîmekê hat veşartin.
Bi sedan şêniyên bajarên Girkê Legê, Dêrik û Çilaxa yên kantona Cizîrê, tevî endamên saziyên sivîl cenazayê şehîd Bêrîtan ji Nexweşxaneya Nîştimanî ya Dêrikê wergirt û bi karwanekî ber bi Pakrewangeha Şehîd Xebat Dêrik ve çûn.
Karwanê cenaze dema gihişt pakrewangehê ji aliyê girseyek mezin ve bi dirûşman hat pêşwazîkirin û merasîmek hat lidarxistin.
Merasîm bi deqeyeke rêzgirtinê destpê kir. Piştre endamê Meclîsa Malbatên Şehîdan a Girkê Legê Hezîm Ebû Zeyd axivî û got: “Divê em têkoşînê berdewam bikin, li ser xeta şehîdan bimeşin û destkefiyên wan biparêzin ta civakeke azad ava bikin ku layiqî keda wan a mezin be.”
Endamê Meclîsa Kongreya Îslama Demokratîk a Dêrikê Yûsif Ehmed jî got: “Ji bo ku em mafên şehîdan û malbatên wan bidin wan divê em gavên şênber biavêjin, mîrateya wan biparêzin, çekê li hemberî dijmin rakin û destkeftiyên ku bi saya keda wan hatine bidestxistin biparêzin.”
Ji fermandarên YPJ’ê Evîndar Dêrik jî behsa têkoşîna şehîd Bêrîtan kir û wiha got “Mînaka jina azad bû. Xwedî ruhê têkoşîn û berxwedanê bû. Li hemberî hemû cûreyên zulma li dijî jinan tê dikoşiya. Her tim li hemberî feraseta baviksalarî radibû û fikrê azadiyê di nava jinan de belav dikir. Di hemû qadên civakî û rêxistinî de têkoşîn kir.”
Piştre nasnameya şehîd Bêrîtan hat xwendin û cenazeyê wê bi dirûşman hate veşartin.
