Bi zêdebûna seqemê û barîna berfê re li deverên Bakur û Rojhilatê Sûriyeyê, koçberên Serêkaniyê yên li kampa Waşûkanê ya li gundewarê bajarê Hesekê yê kantona Cizîrê gelek zehmetiyan dikişînin. Ji ber berfê gelek kon hilweşîn û av ket hundirê konan.
Hejmarek koçberan diyar kir ku êdî kon şert û mercên avhewayê tehemûl nakin, ji ber ku kevin bûne û diçirin, li kêlek wê jî mazota germkirinê tune ye.
Girêdayî mijarê, koçbera bi navê Kemra Îbrahîm Ebdo yê ji xelkê bajarê Serêkaniyê diyar kir ku : “Rewşa me pir xerab e. Av dikeve konan, serma di nava koçberan de zêde bûye û kon li ber şert û mercên avhewayê xwe ranagirin. Mazot têra me nake. Pêdiviya me ya rojane herî kêm bi 15 lîtreyan heye, lê mîqdar kêm e.”
Kemra anî ziman ku “Me ji ber berfê zirar dît, hin kes rakirin nexweşxaneyê. Kesên bitemen zehmetiyan ji ber sermayê dikişînin. Nivîn û kelûpelên me di hundirê kampê de şil bûn.”
Kemra destnîşan kir ku hêviya wan rewş aram bibe û vegerin ser xaka xwe, û got “Em malên xwe dixwazin.”
Koçberiya bi navê Ramî Xidir ê ji gundê Dirdara yê Til Temirê jî anî ziman ku av ket hundirê konên wan, mazot kêm e.
Xidir diyar kir ku seqemê zehmetiyên niştecihên kampê zêdetir kirin.
Xidir bang li aliyên eleqedar û rêxistinên mirovî kir ku destwerdanê bikin û got: “Hêviya me em vegerin mal û gundên xwe.”
Li kampa Waşûkanê bi hezaran niştecihên bi darê zorê ji bajar û bajarokên Serêkaniyê koçber bûne, hene, ji çend salan ve di şert û mercên zehmet ên mirovî û avhewayê de dijîn.
Çavkanî: ANHA
