Komeleya Malbatên Şehîdan (KOMAW) têkildarî sûîqestên siyasî yên li Parîsê daxuyaniyek weşand û diyar kir ku hesabê komkujiyan wê teqez bê pirsîn. Di daxuyaniyê de hate ragihandin ku gelê Kurd bi dehan sal in dibe hedefa polîtîkayên înkar û îmhayê yên dewleta Tirk a faşîst û hate gotin, van êrişan nekarî îradeya gel bişikîne, berevajî; berxwedan mezin kiriye.
Di daxuyaniyê de işaret bi du sûîqestên siyasî yên mezin ên li paytexta Fransa Parîsê hate kirin ku bi destê amûra îstîxbaratê ya dewleta Tirk MÎT’ê ve hatin kirin. Hate bibîrxistin ku 9’ê Çileya 2013’an Sakîna Cansiz, Fîdan Dogan û Leyla Şaylemez, 23’ê Kanûna 2022’an Evîn Goyî, Mîr Perwer û Abdurrahman Kizil hatin kuştin û hate gotin, ev êriş ne tenê li hemberî şexsan bû, di heman demê de li dijî têkoşîna azadiyê ya gelê Kurd, berxwedana jinê û hêviya demokrasiyê bû.
KOMAW’ê diyar kir ku komkujiyên navborî çalakiyên rasthatî yan jî şexsî nînin, sûîqestên siyasî ne ku bi destê dewletê hate plankirin û bi hevkariya torên îstîxbaratê yên navneteweyî bi cih hatin anîn û destnîşan kir, ji ber ku komkujî li navenda welatekî Ewropayê li Fransayê pêk hat û hîn dosya nehatine ronîkirin, ev yek gotinên demokrasiyê yên Ewropayê dixe ber lêpirsînê.
Di daxuyaniyê de hate ragihandin ku berjewendiyên dîplomatîk ketine şûna edaletê, hiqûq bi bêdengiyê hatiye nixumandin û hate destnîşankirin ku ev bêdengî tê wateya hevkariya sûc. Hate gotin, yên hatin qetilkirin rûmeta mirovahiyê ne, ne tenê ya gelê Kurd in û yên hatin qetilkirin weke sembola xwişk û biratiya gelan, têkoşîna jinan û azadiyê hatin pênasekirin.
KOMAW’ê diyar kir ku edalet bi têkoşîna rêxistinbûyî ya gel li kolanan, ne li saziyên dewletê pêk tê û got, jibîrkirin xiyanet e, bêdengî qebûlkirin e. Lewma bang li welatparêzan, jin û ciwanan û dostan hate kirin ku 10’ê Çileya 2026’an li Parîsê beşdarî meş û mîtînga mezin bibin.
Daxuyanî bi peyamên “Edalet nebe aştî jî nîne”, “Hesab wê bê pirsîn” û “Xwîna şehîdên me wê bi azadiya gelan re bigihêje hev” hate dayin.
