Navenda Diyalog û Hevkariyê ya Partiyên Kurdistanî yên Rojhilatê Kurdistanê derbarê civîna partiyên siyasî yên Rojhilat a ji bo piştgiriya gelên Îranê de, daxuyaniyek belav kir.
Di daxuyaniyê de hatiye diyarkirin ku partiyên siyasî yên Rojhilatê Kurdistanê piştgiriya xwe ji bo xebat û serhildana seranserî ya gel û pêkhateyên Îranê nîşan dide. Her wiha hat gotin ku di civînê de biryar hatiye girtin ku ji bo xurtkirin û geşkirina xwepêşandanên li dijî rejîma Îranê karên hevbeş bên kirin.
Berfirehiya daxuyaniya partiyên Rojhilatê Kurdistanê wiha ye;
“Roja 5’ê Çile 2026’an li ser asta bilind civînek ya partiyên siyasî yên Rojhilatê Kurdistanê hat lidarxistin. Di civînê de rewşa siyasî ya Îranê û guhertinên li Kurdistanê hatin nirxandin. Di civînê de piştgiriya xebat û serhildana seranserî ya gelan û pêkhateyên Îranê hat kirin. Biryar hat girtin ku ji bo xurtkirin û geşkirina xwepêşandanên li dijî rejîma Îranê karên hevbeş û berhemdar bên kirin.
Civînê bi deqeyek rêzgirtina ji bo giyanê şehîdan û kesên ku di xwepêşandanên demên dawî de jiyana xwe ji dest dane, destpê kir. Piştre Sekreterê Giştî yê Partiya Demokrata Kurdistanê û Berpirsê Peywendiyên Navenda Diyalog û Hevkariya Partiyên Siyasî yên Kurdistana Îranê, Mistefa Hicrî axaftina vekirinê kir. Hicrî li ser armanca civînê axivî û da zanîn ku erk û berpirsyartiyên ku di vê rewşa niha de dikevin li ser milên partiyên Rojhilatê Kurdistanê hîn girantirin. Piştre civînê bi nêrîn û nirxandina beşdarvanan berdewam kir.
Di civînê de pêla nerazîbûn, grev û xwepêşandanên li dijî Komara Îslamî ku berhemê bi dehan sal yê gendelî, nearamî û siyaseta li di jî gelane, hat nirxandin. Mudaxeleyên bixwîn yên li dijî xwepêşandanên ku li Kirmaşan, Îlam, Melekşah û Loristanê ku bi biryara rasterast a Xumeynî pêkhatin hatin mehkum kirin. Her wiha sersaxî ji malbat û kesûkarên şehîdên xwepêşandanên dawî yên li seranserî Îranê re hat xwestin. Tekeziyê li ser pêwîstiya yekitî û hevgirtina hemû herêmên Kurdistana Îranê, her wiha gavên cidî û pratîkî yên li dijî Komara Îslamî ya ji bo bersivdana siyaseta dijminane û sîstematîk a li dijî tevgera Kurdî kirin.
Her wiha di civînê de biryar hat girtin ku hewldan û şêwrên ji bo amadekirina pêşnûmeyek prensîbên hevkariya partiyên siyasî, diyarkirina nexşerêyek ji bo xurtkirina tevgera siyasî û netewî ya Kurd li Îranê bên zêdekirin.
Di civînê de ji Hizba Komele Seyîd Birahîm Elîzade, Rêxistina Kurdistan û Hizba Komunîsta Îranê, Cîgirê Sekreterê Giştî yê Komela Şoreşgerên Zehmetkêşên Kurdistana Îranê Omer Îlxanîzade, Sekreterê Giştî yê Komela Zehmetkêşên Kurdistanê Reza Kebî, Sekreterê Sazumaniya Xebata Kurdistana Îranê Baba Şêx Husênî, Serokê Partiya Azadiya Kurdistanê Husên Yezdanpena, Hevserokê PJAK’ê Emîr Kerîmî û Sekreterê Giştî yê Hizba Demokrata Kurdistana Îranê Mistefa Hicrî amade bûn.”
