Têkoşîna gerîla di nava gelan de roleke gelek mezin û girîng lîstîye. Bi taybetî weke Tevgera Azadiya jin bandora xwe li her qad, civak û netewê kiriye. Civaka ku di hemû aliyan de hatibû rizandin û jin bibû koleyê malê bi saya Rêber Apo û têkoşerên wekî şehîd Sara xwe ji nû ve nas kirin û bawerî bi xwe anîn. Civaka ku di aliyê hişmendî de wate nedida şoreşê, bi têkoşîna mîna şoreşgerên jin gerîla naskirin û xwe jî beşdarî kar û xebatên şoreşê kirin. Yek ji pêşengê mezin yê vê xetê Şehîd Sara îro jî ji bo hemû jinên cîhanê û bi taybetî ji bo jinên Rojhilata Navîn dibe minakeke gelek mezin.
Di salvegera 14’emîn ya şoreşgera mezin Sara (Sakîne Cansiz) de, yek ji gerîlayên YJA STAR’ê a bi navê Avaşîn Qamişlo ku gerîlayeke enternasyonel a ji neteweya Ereb e, ji sekna şehîd Sara bandor bûye û tevlî nava refên gerîla bûye. Gerîla Avaşîn Qamişlo bi boneya vê rojê hêstên xwe ji ajansa me re parve kir.
‘JI BO JINÊN EREB BÛ MÎNAKA JIYANÊ’
Gerîla Avaşîn Qamişlo di salvegera 14’emîn a şehadeta jina têkoşer Sara de, hemû şehîdên şoreşê bi bîr anî û hestên xwe wiha anî ziman; ‘’Ez destpêkê komploya ku di sala 2013’ an de li ser heval Sara, Rojbîn û Ronahî hate pêk anîn, şermezar dikim û di şexsê heval Sara de hemû şehîdên şoreşê bi bîr tînim. Bejna xwe li hemberî bîranîn û têkoşîna wan ditewînin. Naskirina min a heval Sara di sala 2019’an de çêbû. Me heval bi xwe nedît lê hevalan her carê ji me re behs dikirin. Min bi xwe kesayeta wê jî pir meraq dikir. Ji ber wê min pirtûka wê ya bi navê ‘Jiyana min her tim şer bû’ xwend, ev pirtûk li ser min bi xwe jî pir bandor kir.
‘EW SEMBOLA JINA TOLHILDÊR E’
Bi rastî jî heval Sara weke jineke Kurd bi sekna xwe û têkoşîna xwe, li ser mirovan bandorî ava dike. Hezkirina wê ji bo jiyanê jî li ser têkoşîna min pir bandor dike. Ez her tim wê ji xwe re mînak digrim. Ji berê de jî heval dibêjin heval Sara sembola azadiyê ye, bi rastî jî ev navekî wisa ye ku li heval Sara tê û ew xwedî li wê navê derket. Ez xwe pir bi şans dibînim ku fermandareke me ya weke heval Sara heye, ez bi xwe jî weke ji netewekî Ereb bi hêza jinên Apoyî bandor bûm û tevlî vê tevgerê bûm. Ji kesayeta weke hevala Sara fêrbûn û mîna wê têkoşîn kirin firsendeke gelek mezine ku em xwe ji nû ve ava bikin û azadiyê rast nas bikin. Ji ber wê ez her hewl didim ku di aliyê jiyanî û rêxistinî de xwe xurt bikim. Ji bo ku xwe bigihînim asta têkoşîna hevala Sara hewildanên min pir in.’’
Gerîla Avaşîn Qamişlo di dawîya axaftina xwe de da diyar kirin ku îddîaya wê ya sala 2026’ an bi bilindkirina têkoşînê tije ye û nirxandinên xwe wiha bi dawî kir; ‘’Di sala 2026’ an de em soz didin hevala Sara ku em ê layiqî têkoşîn û berxwedaniya wê bibin. Bi taybetî jî bi banga Rêber Apo ya sala 2025’ an de pêş ket re em ê têkoşîna xwe hîn xurttir bikin. Ji bo em bikaribin xeta heval Sara bidin jiyankirin, destpêkê di jiyanê de em ê rêhevaltiya heval Sara û sekna wê ya têkoşînê ji xwe mînak bigirin û li ser xeta wê bimeşin.’’
