Piştî banga Meclîsa Gel a Taxên Şêxmeqsûd Eşrefiyê, li seranserê Bakur û Rojhilatê Sûriyeyê seferberiya gel hate destpêkirin. Bi sedan welatiyên ji kontonên Cizîr, Firat û Reqayê ber bi Helebê ve bi rê ketin. Yekem konvoya ku duh ji Kantona Firatê bi rê ket, gihîşte Tebqayê û komên cuda yên ji bajarên Cizîr û Reqayê jî ber bi Helebê ve bi rê ketin.
Welatiyê ji Reqayê ber bi Helebê ve bi rê ketiye, bal kişandin ser wateya seferberiyê û got: ‘’Weke gelê ku li Reqayê dijî, em piştgiriyê didin gelê Şexmeqsûdê. Li vir armanc ew e ku em biçin Şêxmeqsûdê û bibin hevparên berxwedanê. Sala borî van deman berxwedana Tişrînê hebû û gelî girse bi girse berê xwe da wir û polîtîkayên dijmin ên qirkirinê pûç kiribûn. Roja îroyîn jî gel bi heman ruhî careke din tê li ba hev. Ev seferberî, peyameke xurt a piştevaniya di navbera gelan de, jiyana hevpar û îradeya parastina nirxan e. Ev berxwedan wê bibe berxwedana gelan.’’
Koçbera ji Serêkaniyê Asya Hesen jî diyar kir ku ew ne biyaniyên tiştên ku rû didin û ev yek anîn ziman: ‘’Ez jî koçber im. Ev komkujî hatin serê me jî. Em îro ji gelê Şêxmeqsûd û Eşrefiyê re dibêjin ku ‘Hûn ne bi tenê ne.’ Gelê Kurd, li Bakur, li Amedê, li Rojhilat û li Başûr li ser piya ye. Gelê Kurd li cem we ye. Em ê xwe bigihînin şoreşger û hêzên xwe yên asayîşê; em ê ya ji destê me tê, bikin. Hûn ne bi tenê ne.’’
Asya Hesen piştre bal kişand ser êrîşên dijmin û got: ‘’Li pêşiya me dijmnekî hov heye; hemû hêzên qirêj ên cîhanê li dora xwe kom kiriye û berê xwe daye me. Cîhanê jî li hemberî vê hovîtiyê çavên xwe girtine. Ji me re dibêjin ku ‘çekên xwe deynin.’ Ji bo çi? Me komkujiyên li ser Elewiyan û gelên din dîtin. Em ne evîndarên çekan in; lê belê em dixwazin li welatekî serbixwe û azad di nava aramiyê de bijîn.’’
Asya Hesen di dawiya axaftina xwe de bang li civaka navneteweyî kir û ev yek anîn ziman: ‘’Em bang li hemû cîhanê dikin: Ger hûn nikarin rawestînin qet nebe paşde vekişin. QSD’ya me û hêzên me yên asayîşm hene; yên ku gelên me diparêzin ew in. Dayîkên me jî li pişt wan in.’’
